जनकपुरधाम : धनुषाको हंसपुर नगरपालिका–७ स्थित बलुवा नदीमा ठेकेदारले समयमा पुल निर्माण नगर्दा स्थानीय समस्यामा परेका छन् । स्थानीयले केही दिनअघि आउजाउ गर्न फलामको पाइपमाथि काठ हालेर अस्थायी पुल बनाएका थिए । त्यही अस्थायी पुल भएर उनीहरूले जोखिमपूर्ण यात्रा गर्थे तर चार दिनअघि बाढीले त्यो पनि बगाएपछि सबैला र हंसपुरको सम्पर्कविच्छेद भएको हो ।
मलाह समुदायले अहिले ट्युबको डुंगा बनाएर सशुल्क यात्रुलाई नदी पार गराउने गरेका छन् । स्थानीय सञ्जय सिंहले ठेकेदारले समयमा पुल नबनाउँदा अहिले बाढीको बेला मोटरसाइकल लिएर जनकपुर जाने अवस्था नरहेको सुनाए । ‘सबैला नगरपालिकाका जनताले पैदल आएर नदी पार गर्छन्’, उनले भने, ‘अनि, हंसपुरमा गाडी चढेर जनकपुर पुग्छन् ।’ नदीमा मोटरसाइकल पार गर्न स्थानीय युवाले १ सय रुपैयाँ लिने गरेको उनले सुनाए ।
सबैला नगरपालिकाका मेयर विजयप्रसाद साहले पुल समयमा नबनेका कारण कहिले धनुषाधाम त कहिले वीरेन्द्र बजार भएर जनकपुर जाने बाध्यता रहेको बताए । ठेकेदारलाई समयमा पुल निर्माण गर्न पटक–पटक भनिए पनि वास्ता नगरेको उनको भनाइ छ । ‘पुल ढलान भइसकेको छ’, उनले भने, ‘माटो पुरेर ग्राभेल मात्र गरिदियो भने समस्या समाधान हुन्छ । तर यति गर्न पनि चाहेको छैन ।’
हंसपुरका मेयर रामज्ञान मण्डलले पनि ठेकेदारको लापरवाहीले समयमा पुल निर्माण हुन नसकेको बताए । ठेकेदारले अटेर गरेका कारण कारबाही प्रक्रिया अघि बढाउनुपर्ने उनको माग छ । अस्थायी पुल पनि बाढीले बगाउँदा सबैला गाउँसँगको सम्पर्क टुटेको पनि उनले सुनाए । भने, ‘सर्वसाधारणलाई आउजाउ गर्न एकदमै कठिनाइ भइरहेकाले वडाध्यक्षलाई जसरी पनि तत्काल वैकल्पिक व्यवस्था मिलाउन भनेको छु ।’
पुल निर्माणका लागि रोशन कन्स्ट्रक्सन जनकपुरले २ करोड ४८ लाख ६९ हजार ठेक्का लिएको जिल्ला प्राविधिक कार्यालयले जनाएको छ । ९ डिसेम्बर ०१५ मा ठेक्का ठेक्का लिएको कम्पनीले २९ मार्च ०१८ मै निर्माण गरिसक्ने सम्झौता गरेको थियो । अहिले कम्पनीले ६ महिनाको म्याद थप्न निवेदन दिएको प्राविधिक कार्यालयका इन्जिनियर नारायणप्रसाद यादवले बताए । तर, ६ महिना म्याद थप्न नसकिने उनको भनाइ छ । भने, ‘म्याद बढीमा तीन महिना थपिन सक्छ । अब तीन महिनामा पुल निर्माण सक्ने अनुमान छ किनकि ८५ प्रतिशत काम भइसकेको छ ।’
प्रतिक्रिया दिनुहोस !
