प्रदेश ५ ब्युरो
बुटवल : अविरल वर्षाले पश्चिम तराई जलमग्न बनेको छ । नारायणी पश्चिमको तराई क्षेत्रका अधिकांश भूभाग पानीमा डुबेको छ । प्रदेश ५ को नवलपरासीदेखि बर्दियासम्म थप डुबानको खतरा बढेको छ ।
वर्षापछिका घटनामा परी प्रदेश ५ मा आठ जनाले ज्यान गुमाएका छन् । रोल्पाको दक्षिणी भेगको सैबाङ गाउँमा पानीले गलेर पुरानो पर्खाल भत्कँदा १८ महिने शिशुसहित तीन जनाको मृत्यु भएको हो । बाँकेमा चार जनाले ज्यान गुमाएका छन् भने दाङमा एक जनाको मृत्यु भएको छ ।
रोल्पामा भान्छाकोठामा आगो तापेर बसिरहेकी सुत्केरीसहित तीन जनाको पुरिएर मृत्यु भएको प्रहरीले जनाएको छ । जिल्ला प्रहरी कार्यालय रूपन्देहीका प्रहरी निरीक्षक सुदर्शन पन्थीका अनुसार मृत्यु हुनेमा रुन्टीगढी गाउँपालिका–५ सैबाङकी १८ दिनकी सुत्केरी २२ वर्षीय कमला विश्कर्मा, उनकी १८ दिनकी छोरी र उनको जेठाजुको १५ वर्षीय छोरी चित्रा विश्वकर्मा रहेका छन् ।
आँगनअगाडिको गारो भत्किएर विश्कर्माको घर पुरिएको हो । सुत्केरीलाई प्राथमिक स्वास्थ्य केन्द्र होलेरी लैजाँदै गर्दा मृत्यु भएको हो भने शिशुसहित दुईको घटनास्थलमै मृत्यु भएको थियो ।
सोही घरको अर्को कोठामा मृतकका पति राजकुमार विश्वकर्मा र सासू भने सुरक्षित हुन सफल भए पनि अचेत अवस्थामा छन् । घटनापछि गाउँ शोकमा डुबेको छ ।
घटनास्थलमा इलाका प्रहरी कार्यालय होलेरी र धौलाबाङ प्रहरी चौकीबाट प्रहरी उद्धारका लागि पुगेको थियो । स्थानीय र प्रहरीले शव निकालेका थिए । तीन वटै शव होलेरी प्राथमिक स्वास्थ्य केन्द्र लगिएको छ ।
गाउँपालिका अध्यक्ष बालाराम बुढामगरका अनुसार होलेरी–स्वर्गद्वारी सडकखण्डमा पर्ने घटनास्थल सैबाङमा थप चार घरसमेत जोखिममा छन् । भत्किएको घरमुनिको अर्को घर पनि जोखिममा छ ।
नेपालगन्ज ः बाँके जिल्लामा बाढीबाट दुई बालबालिकासहित चार जनाको मृत्यु भएको छ । दुई दिनदेखि परेको अविरल वर्षाबाट आएको बाढीमा परी वैजनाथ गाउँपालिकामा दुई, कोहलपुर नगरपालिका र डुडुवा गाउँपालिकामा एक÷एक जनाको मृत्यु भएको हो । बाँके प्रहरी प्रमुख टेकबहादुर तामाङका अनुसार जेठी खोलाले बगाएर बैजनाथ गाउँपालिका–३ का ६५ बर्से तुलाराम बुढा र ज्वालीपुर नालाले बगाएर वैजनाथ–५ का ३५ बर्से लोकबहादुर सुनारको मृत्यु भएको हो । बिहान बाढीमा बगेर बेपत्ता भएका बुढाको शव दिउँसो मात्र भेटिएको थियो ।
त्यसैगरी कोहलपुर नगरपालिका–४ गौवागाउँ निवासी ४ बर्से बालक रञ्जित पासीको घर नजिकैको खाल्डोमा परी र डुडुवा गाउँपालिकाका ४ बर्से रिमाकुमारी यादवको पनि घरअगाडि जमेको पानीमा परेर मृत्यु भएको हो ।
बाढीले नेपालगन्ज उपमहानगरको न्युरोडस्थित सेतु विक चोक र घरवासी टोल क्षेत्र पनि डुबानमा परेका छन् । नेपालगन्जमा बाटो र नालाको काम जारी रहेकै बेला पानी निकास हुन नपाएर डुबान भएको हो ।
त्यसैगरी धनौली क्षेत्रमा रहेको पीडारी नाला बढेका कारण स्थानीयलाई आवातजावतमा समस्या भएको प्रहरीले जनाएको छ । ‘राप्ती नदी क्षेत्रको अवस्था भने सामान्य छ’, एसपी तामाङले भने । अविरल वर्षापछि आएको बाढीको पानीको सहज निकास नभएका कट्कुइँया, लक्ष्मणपुर, कालाफाँटा, नरैनापुर, मटेहिया र गंगापुरका दर्जनौं घर डुबानमा परेका छन् । मातनिया र बनियाँ गाउँका १५ बढी घरमा पानी पसेर विचल्ली भएको र नरैनापुरका ५०÷६० घरमा पानी पसेर क्षति पु¥याएको गाउँपालिका प्रमुख प्रशासकीय अधिकृत दलबहादुर बस्नेतले जानकारी दिए ।
खजुरा गाउँपालिका क्षेत्रमा आएको बाढीका कारण नेपालगन्ज–गुलरिया सडकखण्डको किरण नाला नजिक सडकमा भत्किएर आवातजावत रोकिएको छ । जल तथा मौसम विज्ञान विभागको नेपालगन्ज राँझास्थित हावापानी फिल्ड कार्यालयका अनुसार बाँकेमा १ सय ९१ मिलिमिटर पानी परेको छ ।
तुलसीपुर ः दाङको बबई गाँउपालिका–५ बस्ने सेतुराम वली खेत मृतमा अवस्थामा फेला परेका छन् । उनको मृत्युको कारण भने खुलेको छैन । प्रहरीले अनुसन्धान भइरहेको जनाएको छ । त्यस्तै ट्वाङ खोलाले यात्रुबाहक बस बगाए पनि मानवीय क्षति भएको छैन । अविरल वर्षाले तुलसीपुर सुकौरा सडकमा क्षति भएको हो । सडक भासिँदा केही घर जोखिममा परेका छन् ।
भैरहवा ः अविरल वर्षाले रूपन्देही सदरमुकाम भैरहवा, बुटवल, तिलोत्तमा क्षेत्र जलमग्न भएको छ । विद्यालयमा पानी भरिएपछि परीक्षासमेत स्थगित भएको छ । सिद्धार्थनगर नगरपलिका–३ स्थित खजहाना निमावि डुबानमा परेपछि परीक्षा स्थगित गरिएको हो ।
कक्षाकोठा नै डुबेपछि विद्यालयले दोस्रो दिनको नेपाली विषयको परीक्षा स्थगित गराएको हो । परीक्षा स्थगन भएपछि विद्यार्थीहरूले वडा कार्यालय घेराउ गरेका हुन् ।
विद्यालय डुबेपछि समस्या समाधानको माग गर्दै वडा कार्यालय आउनुपरेको विद्यालयका प्रधानध्यापक सुरेन्द्र प्रसाद मि श्रले बताए । नगरपालिकाले डुबान समस्या समाधान नगर्दा विद्यालयको पूरै कोठाभित्र पानी पसेको र विद्यालयमा रहेका अधिकांश कागजपत्रसमेत भिजेको उनले बताए ।
हवाई उडान प्रभावित
अविरल वर्षाले भैरहवाबाट हुने हवाई उडान प्रभावित भएको छ । भैरहवाबाट हुने सम्पूर्ण उडान भिजिविलिटी कम हुँदासम्म स्थगित भएको गौतम बुद्ध विमानस्थलका प्रमुख टेकराज पोखरेलले जानकारी दिए । गत २४ घण्टामा भैरहवामा १ सय ६६ दशमलव ३ मिलिलिटर वर्षा भएको मापन गरिएको गौतमबुद्ध विमानस्थलको मौसम शाखाले जनाएको छ ।
उता, जिल्ला प्रशासन कार्यालय बर्दियाले बबईको पानीको सतह बढेको भन्दै सतर्क हुन आग्रह गरेको छ । प्रमुख जिल्ला अधिकारी रामबहादुर कुरुंवाङले बाढीबाट क्षति हुन नदिन सतर्कता अपनाइएको बताए । नवलपरासीमा पनि डुबान सुरु भएको छ । सदरमुकाम परासीसहितका बजारक्षेत्रका घरहरू डुबानमा परेका हुन् ।
विद्यालय भवन पहिरोमा
तानसेन ः पाल्पाको निस्दी गाउँपालिका–५ को राईकोट आधारभूत विद्यालयको पर्खाल पहिरोले भत्काएको छ । बेलडाँडा कठैडाँडा हुँदै गावुडाँडा जोड्ने सडकखण्डको माथि रहेको विद्यालयको मुलगेट र भवनको पेटी सडकमा खसेको हो ।
(रोल्पाबाट खेम बुढा, नेपालगन्जबाट शंकरप्रसाद खनाल, भैरहवाबाट सलमान खान, दाङबाट गोपाल शर्मा, पाल्पाबाट कृष्ण पोखरेल)
प्रतिक्रिया दिनुहोस !
