घरेलु मदिरामा स्यानिटरी प्याडदेखि जुत्ता र थोत्रा कपडासम्म
असार २२, २०७५ शुक्रबार २०:२:०
कालिकोटः जिल्ला प्रशासन कार्यालय कालिकोटले बिहीबार साँझ गरेको बजार अनुगमनका क्रममा स्थानीयबासीले उत्पादन गरेको घरेलु मदिरामा फोहोरजन्य पदार्थ मिसाइएको पाइएको छ ।
अनुगमनका क्रममा भेटिएको घरेलु अवैध मदिरामा महिनावारी हुँदा महिलाले प्रयोग गरेका स्यानिटरी प्याड, पुराना जुत्ता र थोत्रा कपडा फेला परेको हो ।
जिल्ला प्रशासन कार्यालय, जिल्ला प्रहरी कार्यालय, उद्योग वाणिज्य संघ र कोष तथा लेखा नियन्त्रण कार्यालयसहितका सरकारी निकायले अनुगमनका क्रममा बरामद गरेको घरेलु मदिरामा प्रहरीले महिनावारीमा महिलाले प्रयोग गरेका प्याड, पुराना जुत्ता र थोत्रा कपडा फेला परेका हुन् ।
प्रमूख जिल्ला अधिकारी चन्द्रनाथ गौतमले बिहीबार बेलुका ५ बजेदेखि गरिएको अनुगमनका क्रममा एक हजार ६ सय लिटर घरेलु अवैध मदिरा, ६ सेट मदिरा बनाउने भाँडा र ग्यास सिलिण्डर बरामद गरिएको जानकारी दिए ।
उनले सदरमुकाम मान्म बजारबाट मात्रै उक्त घरेलु मदिरा जफत भएको बताए । ‘बजारबाट बरामदा मदिराका भाँडा जिल्ला प्रशासन कार्यालयमा खोलेर हेर्दा महिनावारी भएका महिलाले प्रयोग गरेका प्याड, फाटेका जुत्ताका टुक्रा र पुराना कपडा पोलेर हालेको फेला परेको छ’, प्रजिअ गौतमले भने ।
गौतमका अनुसार मानव स्वास्थ्यमाथि खेलवाड गरेर मदिरा उत्पादन गर्ने उत्पादकलाई कारबाही गरिनेछ । ‘मदिारा बरामद भएपछि मदिरा उत्पादन गर्ने पसले भागेका छन्’, उनलेभने, ‘प्रहरीले खोजिरहेको छ । कुनै पनि हालतमा पक्राउ गरेर कारबाही गर्छौँ ।’
सहायक प्रमूख जिल्ला अधिकारी राजकुमार दुलालले मदिराका कारण गाउँमा सामाजिक सद्भाव बिग्रिएको र झगडा हुन थालेकाले नियन्त्रण अभियान थालिएको बताए ।
मदिराले महिला हिंसाका घटना बढेको बताउँदै उनले मदिरा पिएर गाउँमा कयौं ज्यान थालेपछि नियन्त्रण गर्नुपरेको उनले बताए । सहायक प्रजिअ दुलालका अनुसार यस वर्ष ११ पटक गरिएको बजार अनुगमनमा २० हजार लिटर घरेलु मदिरा नष्ट गरिएको छ ।
जिल्ला प्रहरी प्रमूख सुवासचन्द्र बोहोराले कालिकोटमा सबैभन्दा बढी घटना दिराकै कारण हुने भएकाले यस वर्ष मदिरामा कडाई गर्दा अपराधिक घटनामा पनि कमी आएको बताए ।
प्रतिक्रिया दिनुहोस !
