नेपालगन्ज : पूर्वराजा ज्ञानेन्द्र शाहले शनिबार ७२औं जन्मदिन नेपालगन्जमा मनाएका छन् । पूर्वराजा शाहले बिहान ८ बजे नेपालगन्जको बागेश्वरी मन्दिरमा पूजा गरेका थिए । झन्डै आधा घण्टा उनको पूजा चलेको थियो । बागेश्वरी पुगेका शाहलाई भेट्न मन्दिर परिसरमै शुभेच्छुकको ओइरो लागेको थियो ।
उनले विहानदेखि दिउँसोसम्म गरी साढे तीन घण्टा कारकाँदोस्थित चार तारे होटल सोल्टीमा शुभेच्छुकसँग जन्मदिन मनाएका थिए । होटलमा विहान १० बजेदेखि १ः३० सम्म शुभेच्छुकलाई शुभकामना दिने समय मिलाइएको थियो ।
शुभकामना दिन पूर्वमन्त्री जगत गौचन लगायतका दरबारका निकटका व्यक्तिहरुको टोली काठमाडौंबाट नेपालगन्ज आएको थियो । नेपालगन्ज उपमहानगरपालिकाका प्रमुख डा.धवल शम्शेर राणाले पनि पूर्वराजा ज्ञानेन्द्रलाई बधाई तथा शुभकामना दिएका थिए ।
राष्ट्रिय प्रजातन्त्र पार्टीका केन्द्रीय सदस्य ऋषिराज देवकोटाका अनुसार पूर्वराजाको जन्मदिनमा राजधानीमा देखिने अधिकांश व्यक्ति नेपालगन्ज आएका छन् ।
बुधबार पूर्वराजा ज्ञानेन्द्र पत्नी कोमल, बुहारी हिमानी नातिनातिनासमेत स–परिवार विमानबाट नेपालगन्ज आएका हुन् ।
छोरा पारस भने गाडीबाट आएका थिए । शाहको जन्म दिन मनाउन नेपालगन्ज–२ का भुवनकृष्ण श्रेष्ठको संयोजकत्वमा नागरिक मूल समारोह समिति र विभिन्न उपसमितिहरु नै गठन गरिएको थियो ।
प्रतिक्रिया दिनुहोस !
