तानसेन : पहाडी बाटोका घुम्ती काटिएपछि सडक सजिलो र छोटो बनेका छन् । पाल्पा र गुल्मीका मुख्य सडकमा रहेका ठूला घुम्तीलाई काटोर सीधा बनाइएको हो । सडक विभागले घुम्ती सुधारेपछि सडक दुर्घटना र दूरीसमेत घटेको छ ।
पाल्पा र गुल्मीका मुख्य सडकका साँघुरा घुम्ती कटान गरी सीधा सडक बनाउँदै दुर्घटना न्यूनीकरण अभियान सुरु भएको छ । बढ्दो सवारी चाप र प्राविधिक हिसाबले जटिल अप्ठ्यारा घुम्तीलाई सवारीसाधन आवतजावत स्पष्ट देख्न सक्ने गरी सडक सुधार अभियानले यात्रु र सवारीसाधन चालकलाई राहत मिलेको हो ।
सडक डिभिजन कार्यालय पाल्पाले आर्थिक वर्ष ०७२/७३ देखि अप्ठ्यारा घुम्ती हटाउन सडक चौडा गरेर स्तरोन्नति गर्ने कार्य थालनी गरेको छ । तानसेन–तम्घास खण्डमा हार्थोक, लघुवा, रिडी, रातामाटा, बलेटक्सारसम्मका जटिल घुम्ती हटाइएको छ । आर्यभञ्ज्याङ–रामपुर सडकमा सिलुवादेखि रामपुरसम्मका घुम्ती, सिद्धार्थ राजमार्गको तानसेन–बुटवल सडकखण्डमा कालमाटी क्षेत्रबाट घुम्ती कटानको काम भएको छ । अत्यधिक दुर्घटना हुने घुम्तीहरूलाई लक्ष्य गरी काम भइरहेका छन् । रणनीतिक सडक पुनःस्थापना तथा मर्मत कार्यक्रम, बृहत् लुम्बिनी चक्रपथ, सडक योजनाअन्तर्गत घुम्ती सुधार योजनाअन्तर्गत निर्माणको काम भएको सडक विभाग पाल्पाले जनाएको छ । तानसेन तम्घास सडकमा साँघुरा घुम्तीका कारण सवारीसाधन नदेखिने तथा मोड काट्न कठिन थियो । अहिले घुम्ती कटान र चौडा भएकाले ट्रक चलाउनसमेत सजिलो भएको १० वर्षदेखि तानसेन–तम्घास सडकमा सवारी चलाउँदै आएका विविन कुँवरले बताए ।
तानसेन–तम्घास सडकमा अत्यन्तै साँघुरा मोड, तथा घुम्तीहरूको कटान सुरु भएपछि कुँवरजस्ता चालकहरूको खुसी बढेको छ । एकतर्फी बाटोमा मोटरसाइकल चलाउन पनि कठिन थियो । ‘मोड तथा घुम्तीहरूका विपरीत दिशाबाट आएका सवारीसाधन देखिदैनथ्यो, मोटरसाइकल मोड्नसमेत कठिन थियो । अहिले गुल्मीको रातामाटा, पाल्पाको अर्गली, लघुवा र हार्थाेकसम्मका घुम्ती सुधार भएकाले यी क्षेत्रमा सवारीसाधन चलाउन सजिलो भएको छ’, गुल्मी तम्घासका विष्णु गौतमले बताए । मोड सुधारले यात्रुदेखि चालकलाई सुरक्षित बनाएकोले तानसेनदेखि तम्घाससम्मका सबै घुम्ती सुधार तथा मोड कटान गर्न रुरु गाउँपालिका–१ रिडिका शेषनारायण मरासिनीले सडक विभागलाई अनुरोध गरेका छन ।
तानसेन तम्घास सडकमा करिब १ सय ५० वटा जोखिम घुम्ती रहेकोमा हालसम्म ५० भन्दा बढी कटान गरी सडक सीधा गरी चौडा पारिएको डिभिजन सडक कार्यालयका इन्जिनियर पवित्रमणि आचार्यले बताए ।
सडकमा घुम्ती सुधार कार्यक्रमअन्तर्गत पहिलो वर्ष घुम्ती काट्ने दोस्रो वर्ष कालोपत्रे हुँदै आएको छ । पहिलो वर्षको काम प्रभावकारी भएपछि पछिल्ला वर्षहरूमा समेत घुम्ती सुधार कार्यक्रमले निरन्तरता पाएको छ । एसियाट्रिक–प्रदीप जेभीले ५ करोड, हिमढु एण्ड थोकर–सूर्य चन्द्र जेभीले ३ करोड, एसबीए–सूर्यचन्द्र जेभी निर्माण कम्पनीले ७ करोड रुपैयाँमा घुम्ती सुधार र सडक स्तरोन्नतिको काम गर्दै आएका छन् । पाल्पा र गुल्मीका सडकहरूकोे घुम्ती सुधारले सवारी दुर्घटना न्यूनीकरणसँगै सडक चौडा भएपछि यात्राको समय छोटिएको छ ।
प्रतिक्रिया दिनुहोस !
