राेल्पा : पश्चिमी रोल्पामा ट्रयाक्टर दुर्घटना हुँदा चालक र सहचालकको मृत्यु भएको छ । माडीगाउँपालिका-१ भिताबाङमा ट्रयाक्टर सडकबाट पल्टिँदा दुईजनाको घटनास्थलमै ज्यान गएको हो ।
घर्तीगाउँबाट ओट जाँदै गरेको रा १ त १५०७ ट्रयाक्टर बुधबार राति साढे आठ बजे दुर्घटना भएको हो । दुर्घटनामा चालक २७ वर्षका आशाराम चौधरी र र सहचालक १८ वर्षीय डम्बरबहादुर वलीको मृत्यु भएको प्रहरीले जनाएको छ । चालक चौधरी दाङ तुल्सीपुर उपमहानगरपालिका-७ टिकारापाकाका हुन् भने सहचालक गंगादेव गाउपालिका -१ रोल्पाका हुन्।
गाउँलेले दुर्घटनाबारे प्रहरीलाई खबर गरेका थिए । उद्दारका लागि इलाका प्रहरी कार्यालय घर्तीगाउँबाट प्रहरी निरीक्षक राजकुमार पहाडीसहित ११ जनाको प्रहरी टोली घटनास्थल पैडल पुगेको थियो । शब उठाएर राति नै घर्तिगाउँ ल्याइएको जिल्ला प्रहरी प्रमुख प्रहरी नायब उपरीक्षक ज्ञानेन्द्रप्रसाद फुयाँलले बताए । ट्रयाक्टर क्षतिग्रस्त छ । सडकबाट ट्रयाक्टर करिव तीन सय मिटर तल खसेको थियो।
चालक र सहचालकको मृत्यु भएकाले दुर्घटनाको कारण खुलेको छैन । बालुवा र सिमेन्ट बोकेको ट्रयाक्टर गंगादेव गाउँपालिका(१ का चुरामणी वलीको हो । घटनाबारे अनुसन्धान भइरहेको प्रहरीले जनाएको छ । शव पोष्टमार्टमका लागि जिल्ला अस्पताल रेउघा ल्याईदैछ ।
प्रतिक्रिया दिनुहोस !
