चौथो श्रीमती बनाउने आश्वासन दिएपछि ...
भीमदत्तनगर : डडेल्धुराकी २२ वर्षीया सीता भण्डारी (नाम परिवर्तन) श्रीमान्ले पाँच वर्षदेखि वास्ता गर्न छाडेपछि बिचल्लीमा परिन्। कलिलो उमेरमै विवाह गरेकी ती युवतीलाई श्रीमान्ले छाडेपछि मानव बेचबिखनमा संलग्न समूह(दलाल) को फन्दामा परिन्।
ती युवतीको अवस्थालाई नजिकबाट नियाल्दै आएका डडेल्धुरा अमरगढी नगरपालिका-८ का रुपेन्द्र पाण्डेयले अनेकौँ प्रलोभनमा पारेर भारत लैजाँदै गर्दा कञ्चनपुरको पश्चिमी नाका गड्डाचौकीबाट उद्दार गरिएपछि रहस्य खुलेको हो।
पाण्डेयले युवतीलाई कैलालीको धनगढीमा १२ कोठे घर र अन्य सम्पतिसमेत छ भन्दै फकाएर भारत लगिरहेको अवस्थामा प्रहरीको फन्दामा परेका हुन्। कञ्चनपुर प्रहरी हिरासतमा रहेका पाण्डेयले युवतीलाई सामान किन्ने बहानामा दिल्ली लैजाँदै गड्डाचौकीमा पक्राउ परेका हुन् । मानव बेचबिखन तथा ओसारपसार नियन्त्रणका लागि गड्डाचौकीमा स्थापना गरिएको 'थ्री एन्जल्स नेपाल' संस्थाले गत असार २३ गते ती युवतीको उद्धार गरी आफ्नो संरक्षणमा राखेको छ।
'युवतीका श्रीमान् पनि भारतमै लामो समयदेखि मजदुरी गरिरहेका रहेछन्', थ्री एन्जल्स नेपाल कञ्चनपुरका इन्चार्ज बेलु नेपालीले रासससँग भने।आर्थिक अवस्था निकै कमजोर भएपछि ती युवती दलाल पाण्डेयको प्रलोभनमा परेकी खुलेको छ।
पाण्डेयले ती युवतीलाई विवाह गर्ने प्रलोभन दिएको नेपालीले बताएका छन्। विवाहपछि भारतमै बस्दै आएकी युवतीका श्रीमान् अहिलेसम्म सम्पर्कमा छैनन्। लामो प्रयासपछि मानव बेचबिखनमा सक्रिय पाण्डेयलाई डडेल्धुराको पोखराबाट प्रहरीले पक्राउ गरिएको हो।'युवतीका गहनासमेत बेचेर श्रीमती भन्दै भारत लगिरहेको थियो, 'थ्री एन्जल्स नेपालकी इन्चार्ज नेपाललीले भनिन्। उनलाई सोधपुछका क्रममा नियन्त्रणमा लिएपछि अभियुक्त पाण्डेय भारतको बनबासातर्फ भागेका थिए। उनी भारतको झुलाघाट हुँदै बैतडीबाट डडेल्धुरा फर्किएका थिए ।
पक्राउ परेका पाण्डेयमाथि कानुनी कारबाही अघि बढाइएको छ। 'अनुसन्धानका क्रममा पाण्डेयको घरमा तीनवटी श्रीमती रहेको खुलेको छ,' नेपालीले भने, 'दुईवटा श्रीमती घरमै छन्, अर्की श्रीमती बाहिर बस्दै आएको पाइएको छ ।'
थ्री एन्जल्सले उद्धारपछि ती युवतीलाई आयमूलक सीपका लागि केन्द्रीय कार्यालय पोखरा पठाउने तयारी गरेको छ । 'पोखरामा सीप सिकेर केही काम गर्ने योजनामा छु,' युवतीले भनिन्।
पश्चिमी नाका गड्डाचौकीबाट पछिल्लो समय रोजगारीका लागि तेस्रो मुलुक जाने महिलाको संख्या बढ्दै गएको छ । घरबाट विभिन्न बहना बनाई दलालको सम्पर्कमा आएर सो नाकाबाट महिला सिधैं दिल्ली पुग्ने गरेका छन्। रासस