परासी : निर्माण व्यवसायीको लापरबाहीका कारण पश्चिम नवलरासीको परासी–नारायणचोक हुलाकी सडक दुई सातादेखि अवरुद्ध छ । सडक निर्माणको काम सुरु गरेको निर्माण कम्पनीले सयममै काम नगर्दा अहिले सो सडकखण्डमा सवारीसाधन चल्न सकेका छैनन् । पैदल यात्रुले समेत सास्ती पाएका छन् । यो सडक राष्ट्रिय गौरवको आयोजना हो ।
सडक निर्माणका लागि ठाउँठाउँमा खसालिएको माटो व्यवस्थित नगर्दा पानी पर्नासाथ सडक हिलाम्मे हुने गरेको छ । अधिकांश स्थानमा रहेका खाल्डा खुल्डीसमेत पुरिएको छैन । सडकमा ग्राभेल नराख्दा हिलो र खाल्डा खुल्डीका कारण सवारीसाधन चल्न नसकेका हुन् । सडक अवरुद्ध हुँदा परासी–जहदादेखि गोपिगञ्ज पुग्ने सवारीसाधन भूमही–बर्दघाट हुँदै २५ किमि दूरी पार गरेर जानुपर्ने बाध्यता छ । परासीबाट नारायणचोकको दूरी साढे १२ किमि छ ।
सडक निर्माणका लागि हुलाकी सडक आयोजनाले हेटौंडास्थित कञ्चनजंघा शिवशक्ति बिरुवा जेभी नामक कम्पनीलाई जिम्मेवारी दिएको छ । सडक डिभिजन कार्यालय बुटवलको रेखदेखमा भइरहेको सडक निर्माणको लागत २५ करोडको हो । सडकमा ग्राभेल नराखेका कारण वर्षायाममा सडक हिलाम्मे भई आगमनमा समस्या भएको सडक डिभिजन कार्यालय बुटवलका डिभिजन प्रमुख कैलाश श्रेष्ठले बताए । उनले सडक मर्मतका लागि व्यवसायीलाई पटक पटक ताकेता गर्दासमेत निर्माण सामग्री अभावको बहाना देखाएर उम्किन खोजेको बताए । ग्राभेलको व्यवस्था गरेर तत्काल सडकलाई व्यवस्थित बनाउन व्यवसायीलाई ताकेता गरेकाले एक÷दुई दिनमा समस्या समाधान हुने श्रेष्ठले बताए ।
सडक निर्माण कार्य दुई वर्षभित्र सम्पन्न गरिसक्नुपर्ने सम्झौता छ । २०७३ फागुनबाट सुरु गरिएको सडक आउँदो फागुनसम्म सम्पन्न गरिसक्नुपर्ने भए पनि निर्माण सामग्रीको अभाव देखाउँदै व्यवसायीले काममा ढिलाइ गर्दा समयमा सम्पन्न हुन नसक्ने अवस्था देखिएको छ ।
निर्माण कार्यका लागि आवश्यक ग्राभेल अभावले समस्या भएको निर्माण कम्पनीका इन्जिनियर मेघराज खनालले बताए । उनले केही दिनमा ग्राभेलको व्यवस्था गरेर सडकलाई व्यवस्थित गरिने बताए । अहिलेसम्म सडक सम्याउने, माटो फिलिङसहित अन्य स्ट्रकचरका काम सकिएको इन्जिनियर खनालले जानकारी दिए । निर्माण सामाग्रीको अभाव नभए तोकिएकै समयमा काम सम्पन्न हुने खनालको दाबी छ । ११ मिटर चौडाइ रहेको सडकखण्डको सात मिटर कालोपत्रे हुनेछ ।
प्रतिक्रिया दिनुहोस !
