दमक : विद्यार्थीमा अनौठो लक्षण देखिएपछि मोरङको उर्लाबारी–१ झाँरसादीस्थित शारदा माविमा पठनपाठन रोकिएको छ । डाक्टरले मनोपरार्शदाताको आवश्यकता औंल्याएपछि विद्यालयले अभिभावकको दबाबमा शनिबार धामीझाँक्री ल्याएर पूजापाठ सम्पन्न गरेको छ ।
विद्यार्थीमा यही बुधबारदेखि अनौठो लक्षण देखापरेको थियो । विद्यार्थीले बरबराउने, दाँत किट्ने, हातखुट्टा बजार्ने गर्न थालेपछि विद्यालय बन्द गर्नुपरेको प्रधानाध्यापक सूर्यप्रसाद दाहालले बताए । कक्षा ८, ९ र १० का विद्यार्थीले यस्तो गतिविधि गर्ने गरेको शिक्षक छत्र अधिकारीको भनाइ छ । उनका अनुसार अहिलेसम्म नौ छात्रा र दुई छात्र गरी ११ विद्यार्थीमा यस्तो लक्षण देखापरेको छ ।
केही विद्यार्थीलाई उपचारका लागि मंगलबारे अस्पताल लगिएको छ । डाक्टरले विद्यार्थीलाई ‘मास कन्भर्जन डिसअर्डर’ भएको बताएको दाहालको भनाइ छ । ‘डाक्टरले यो रोग औषधिले निको नहुने बताए’, उनले भने । डाक्टरले यी विद्यार्थीलाई मनोचिकित्सककहाँ लैजान सुझाएको उनको भनाइ छ । ‘हामीले नगरपालिकासँग समन्वय गरी जनस्वास्थ्य कार्यालयबाट मनोपरामर्शदाता बोलाएका छौं’, उनले भने ।
पीडित विद्यार्थीले भने आफूहरूलाई डर लाग्ने गरेको बताएका छन् । डर लागिसकेपछि के–के गरें भनेर थाहा नहुने एक छात्राले बताइन् । अभिभावकले भने पहिला यस्तो कहिले पनि नभएको बताएका छन् । डाक्टरले यस्तो रोग निको पार्न नसक्ने भन्दै उनीहरूले विद्यालयलाई धामीझाँक्री लगाउन दबाब दिएका छन् । अभिभावकको ‘मन बुझाउन’ विद्यालयले शनिबार धामीझाँक्रीको उपस्थितिमा पूजा सम्पन्न गरेको छ । धेरैजसो अभिभावकको विश्वास धामीझाक्रीले निको पार्छ भन्ने रहेकाले चित्त बुझाउन पूजा गरिएको शिक्षक अधिकारीले बताए ।
चिकित्सा मनोवैज्ञानिक डा. शालिग्राम भट्टराईले भने ‘मास कन्भर्जन डिसअर्डर’ एक किसिमको चिन्ता भएको प्रस्ट्याए । यस्तो लक्षण १२ देखि १९ वर्षसम्मको किशोरावस्थामा देखिने उनको भनाइ छ । यो लक्षण समूहमा देखिने भएकाले किशोरीलाई बढी मात्रामा र किशोरलाई कम हुने उनको भनाइ छ । ‘आफूलाई अरूले ध्यान देओस् भन्ने हुन्छ र बढी चिच्याउने, कराउने गर्छन्’, उनले भने ।
यस्तो लक्षण देखिए विद्यार्थीलाई सुरक्षित ठाउँमा राख्ने र एक्लै छाड्नुपर्ने उनको सुझाव छ । भीडभाडबाट टाढा छाडिदिएपछि बिस्तारै ठकि हुने उनको भनाइ छ । उनका अनुसार यस्तो लक्षण देखिए धामीझाँक्री लगाउनेभन्दा पनि मनोपरामर्श दिनुपर्छ ।
प्रतिक्रिया दिनुहोस !
