धनगढी : नयाँ मुलुकी अपराध संहितामा गरिएको व्यवस्था खारेजी माग गर्दै आन्दोलित स्वास्थ्यकर्मीले प्रदेशस्थित स्वास्थ्य संस्थाका ओपीडी सेवा बन्द गरेका छन् । सरकारले भदौ १ गते लागू गरेको मुलुकी ऐनले चिकित्सक तथा स्वास्थ्यकर्मीलाई अपराधको व्यवहार गर्नेतर्फ लक्षित भएको भन्दै चिकित्सक देशव्यापी रूपमा आन्दोलित भएका हुन् ।
नेपाल चिकित्सक संघको अगुवाइमा आन्दोलित उनीहरूले मुलुकी अपराध संहिताको दफा २३०,२३१, २३२ र २४० लाई संशोधन गर्न माग गरेका छन् । चिकित्सक संघका प्रदेश–७ सचिव प्रदीप मि श्रले केन्द्रीय कार्यक्रमअनुसार आन्दोनमा गएको बताए ।
डडेलधुरा अजयमेरु गाउँपालिका–६ का बलबहादुर विष्ट पेटको बिरामी हुन् । उनी उपचार गर्न छोरासँग धनगढी पुगे । सेती अञ्चल अस्पतालमा विशेषज्ञ डाक्टरलाई देखाउन आएका उनी चिकित्सकको आन्दोलनका कारण ओपीडी बन्द भएपछि रित्तै फर्किए ।
‘आइतबार उपचार गरेर फर्किने योजना बनाएको थिएँ’, उनले भने, ‘आन्दोलनले गर्दा ओपीडी सेवा बन्द रहेछ । कहिले खुल्ने हो ।’ हजार रुपैयाँ भाडा तिरेर टाढाबाट आएका विष्ट उपचार नपाएपछि निरास थिए ।
आइतबार सेती अञ्चल अस्पतालको ओपीडि कक्षमा उपचार गर्न पुगेका धेरै बिरामी निरास हुँदै घर फर्केका छन् । सेती अञ्चल अस्पातलमा दैनिक करिब ५ सय बिरामी ओपीडी सेवामा उपचारका लागि आउने गर्छन् ।
‘राम्रो आम्दानी भएकाहरू निजी क्लिनिकमा उपचार गर्न जान्छन्’, धनगढी गेटाकी पदमा विकले भनिन्, ‘समस्यामा पर्ने हामीजस्ता सर्वसाधारण नै हो । हाम्रो समस्या न चिकित्सक बुझ्छन् न त सरकार !’ कसले केका लागि बन्द गर्छ आफूलाई त केही थाह नभएको उनले बताइन् । सरकारी ओपीडी सेवा बन्द भए पनि चिकित्सकले आफ्नो क्लिनिक भने बन्द नगर्ने गरेको उनको गुनासो छ । ‘सबैतिरबाट सर्वसाधारण नै मारमा पर्ने हुन्’, कञ्चनपुर पुनर्वासका पुरन साउदले भने, ‘आफ्नो स्वार्थका लागि जनतालाई दुःख दिनेबाहेक अरू केही होइन ।’
संघले कैलाली प्रमुख जिल्ला अधिकारीमार्फत प्रधानमन्त्रीलाई ज्ञापनपत्रसमेत बुझाएको छ ।
प्रतिक्रिया दिनुहोस !
