विराटनगर : नेकपा अध्यक्ष पुष्पकमल दाहाल सोमबार ‘टाइट सेड्युल’बीच विराटनगर विमानस्थल ओर्लिए । चार घण्टाको यात्रामा उनीसँगै थिए, महासचिव विष्णु पौडेल । उनीहरू तिहार र छठ पर्वको शुभकामना आदानप्रदान तथा चियापान कार्यक्रममा सहभागी हुन यहाँ आएका थिए । पार्टी एकतापछि पहिलो पटक तत्कालीन एमालेको कार्यालयमा कार्यक्रम आयोजना गरिएको थियो । विमानस्थलमा उनले सरकारलाई गाडीसँग तुलना गरेका थिए । ‘हिलोमैलो हुँदा गाडी एक नम्बर गियरले चलाउनुपर्ने हुन्छ ।
हिलोमैलो सकिएको छ । अब गति लिन्छ’, उनले भने, ‘गियर फेरेर भए पनि सरकार अगाडि जान्छ र जनताले सरकारको विकल्प छैनन् भन्न थाल्नेछन् ।’ पार्टी कार्यालयमा भने उनले एकताका उपलब्धिबारे बोलेका थिए ।
उपराष्ट्रपति नन्दबहादुर पुनले आयोजना गरेको चियापानमा सहभागी हुने भन्दै उनीहरू अपराह्न काठमाडौं फर्किए । त्यसपछि मन्त्रीहरू लालबाबु पण्डित र भानुभक्त ढकाल कार्यक्रममा आकर्षण बने । उनीहरूलाई प्रदेशका मन्त्रीले साथ दिए । पण्डित र ढकाल एक सातादेखि आआफ्ना क्षेत्रमा हुने चियापानमा सहभागी भइरहेका छन् ।
त्यस्तै, कांग्रेस संसदीय दलका उपनेता विजयकुमार गच्छदार पनि पूर्व आएका छन् । मोरङ र सुनसरीका दर्जनभन्दा बढी कार्यक्रममा उनले सहभागिता जनाएका छन् । पार्टी एकतापछि कांग्रेसले नयाँ गति लिने भन्दै उनले कार्यकर्तालाई हौस्याउने गरेका छन् । ‘अब नयाँ सोच र दृष्टिकोणबाट चल्ने भएकाले कांग्रेसको विकल्प छैन’, मोरङको धनपालथान गाउँपालिकामा आयोजित कार्यक्रममा गच्छदारले भने ।
कांग्रेस केन्द्रीय सदस्य शेखर कोइराला, मीनेन्द्र रिजाल, गगन थापा, गुरुराज घिमिरे, अमृत अर्याल, विश्वप्रकाश शर्मालगायत नेतालाई चियापान भ्याउन भ्याइनभ्याइ छ । कांग्रेसले आइतबार रतुवामाई नगरपालिकास्थित झुर्कियामा आयोजना गरेको कार्यक्रममा बाक्लो उपस्थिति थियो । केन्द्रीय नेताको उपस्थितिले गाम्रीण भेगमा कार्यक्रमको रौनक देखिएको थियो । रतुवामाईकै कर्सियामा आयोजित कार्यक्रममा पनि स्थानीयको भीड लागेको थियो । मोरङ कांग्रेसले पार्टी कार्यालयमै चियापान ग¥यो । ‘चाडबाडमा भेटघाट र शुभकामना दिन कार्यक्रममा पुग्ने गरेको छु’, नेता कोइरालाले भने, ‘कार्यक्रममा सहभागी हुन बिहानदेखि निमन्त्रणा आउँछ ।’ उनी निवासबाट बिहान ७ बजे निस्किन्छन् ।
नेकपाले रंगेलीमा गरेको कार्यक्रममा सहभागिता बाक्लो थियो । मुख्यमन्त्री शेरधन राईसहित प्रदेशका मन्त्री सहभागी थिए । समृद्धिको चाहना पूरा गरिने मुख्यमन्त्री राईको भनाइ थियो । ‘विकास र जनताको पीरमर्का बुझ्न स्थानीय र प्रदेश सरकार आएका हुन्’, उनले भने ।
नेकपाका केन्द्रीय सदस्य विनोद ढकालले चियापान र शुभकामना आदानप्रदान कार्यक्रम केन्द्रले थितिको स्वरूप भएको बताए । ‘कांग्रेस र कम्युनिस्टले प्रतिबन्धित कालमा निरंकुशताका विरुद्धमा विचार आदानप्रदान गर्न यस्ता कार्यक्रम संयुक्त रूपमा गर्दथे’, उनले भने, ‘अहिले अलग-अलग गरे पनि सबैलाई निमन्त्रणा भने गर्ने गरिएको छ ।’ यस्ता कार्यक्रमले संस्कृति, संस्कार जोगाउन र भाइचारा बढाउन मद्दत मिलेको उनको भनाइ छ ।
प्रतिक्रिया दिनुहोस !
