काठमाडौं : थ्रीस्टार क्लब रेडबुल ‘ए’ डिभिजन लिगको शीर्ष स्थानमा उक्लिएको छ । एन्फा कम्प्लेक्स मैदान सातदोबाटोमा आइतबार भएको खेलमा थ्रीस्टारले ब्रिगेड ब्वाइज क्लबलाई ५-१ गोलले हरायो । टोलीका प्रभावशाली कप्तान विक्रम लामाले पुनरागमन गरेको एकपक्षीय खेलमा थ्रीस्टारले नवौं मिनेटमा पेनाल्टी गोलमार्फत खाता खोलेको थियो ।
थ्रीस्टारका नीराजन खड्कालाई डीबक्स भित्र ब्रिगेडमा रन्दीप पौडेलले फल हानेर लडाएपछि पाएको पेनाल्टीलाई रजिन धिमालले सदुपयोग गरेका थिए । पहिलो हाफमा १-० को अग्रता बनाएको थ्रीस्टारले दोस्रो हाफमा चार गोल थपेको थियो । ५१औं मिनेटमा थ्रीस्टारका सुनील बलले दोस्रो गोल गरे । रञ्जन विष्टले ८४औं र नीराजन खड्काले ८९औं मिनेटमा गोल गरे ।
इन्जुरी समयमा कप्तान विक्रम लामाले गोल गर्दै टोलीको जित सहज बनाएका थिए । विक्रमको १० महिनाअघि धरानमा भएको बूढासुब्बा गोल्डकप खेल्ने क्रममा दायाँ खुट्टा भाँचिएको थियो । त्यसपछि उपचार गराइरहेका विक्रम लामो वि श्रामपछि खेलमा फर्किएका हुन् । ब्रिगेडका लागि ७५औं मिनेटमा राजन तिवारीले सान्त्वना गोल फर्काए । थ्रीस्टारका सुनील बल म्यान अफ दी म्याच घोषित भए । उनले १० हजार रुपैयाँ पुरस्कार पाए ।
लगातार दोस्रो जितसँगै ६ अंक बनाएको थ्रीस्टार तालिकाको शीर्ष स्थानमा छ । समान अंक बनाएको मनाङ मस्र्याङ्दी क्लब गोलअन्तरका आधारमा दोस्रो स्थानमा छ । थ्रीस्टारले पहिलो खेलमा फ्रेन्ड्सलाई २-१ गोलले हराएको थियो । दुुवै खेल गुमाएको ब्रिगेडले खाता खोल्न सकेको छैन । ब्रिगेड पहिलो खेलमा मनाङसँग ३-१ गेलले पराजित भएको थियो ।
खेलपछि थ्रीस्टारका प्रशिक्षक मेघराज केसीले एक महिनापछि पुनः सुरु भएको खेलमा खेलाडीले सन्तोषजनक प्रदर्शन गरेको बताए । ब्रिगेडले पहिलो हाफमा राम्रै टक्कर दिएको थियो । तर हामीले बल पोसेसन र आक्रमण जारी राख्दा दोस्रो हाफमा धेरै गोल भयो,’ मेघराजले भने । मनाङसँगको आगामी खेल थप प्रतिस्पर्धात्मक हुने उनले बताए । ब्रिगेडमा प्रशिक्षक उर्जन श्रेष्ठले सुरुआतमै पेनाल्टी गोल खाँदा टोलीको लय गुमेको बताए । ‘थ्रीस्टार बलियो टोली हो । उसलाई हामीले बराबरीमा रोक्न चाहेका थियौं । विदेशी खेलाडीले पनि सोचेजस्तो खेल्न नसक्दा हार भयो,’ उर्जनले भने ।
यसैगरी आइतबारकै अर्को खेलमा विभागीय टोली नेपाल पुलिस क्लबले मच्छिन्द्र क्लबसँग गोलरहित बराबरी खेल्दै अंक बाँडेको छ । खेलमा आक्रामक देखिएको पुलिसले पहिलो हाफमा मात्र तीनवटा राम्रो गोल गर्ने अवसर खेर फालेको थियो । पुलिसविरुद्ध रक्षात्मक देखिएको मच्छिन्द्रले दोस्रो हाफमा सुधारिएको खेल खेले पनि गोल गर्न सकेन । पुलिसको गोल गर्ने प्रयास दोस्रो हाफमा पनि सफल बन्न सकेन ।
टोलीमा युवा खेलाडीको बाहुल्य रहेको पुलिसले दोस्रो हाफको अन्तिम १० मिनेट भोला सिलवाललाई उतारेको थियो । घाइते भएका कारण भोलाले दुई वर्षदेखि राष्ट्रिय टोली गुमाउँदै आएका थिए । उनी यही लिगमार्फत फुटबलमा फेरि जम्ने प्रयासमा छन् । बराबरीसँगै पुलिसले चार अंक बनाएको छ ।
पुलिसले पहिलो खेलमा जाउलाखेललाई १-० गोलले हराएको थियो । दुवै खेलमा बराबरी नतिजा आत्मसाथ गरेको मच्छिन्द्रले दुई अंक बनाएको छ । मच्छिन्द्रले पहिलो खेलमा च्यासलसँग गोलरहित बराबरी खेलेको थियो । खेलपछि पुलिसका प्रशिक्षक अनन्त थापाले जितका लागि खेले पनि सम्भव नभएको बताए । ‘मिडिल लाइनमा रहन चाहने टोलीहरू बराबरीका नतिजाका लागि खेल्ने गर्दछन् । आज पुलिसले मच्छिन्द्रको रक्षापंक्ति तोड्न सकेन,’ अनन्तले भने । मच्छिन्द्रका प्रशिक्षक धनेश्वर प्रजापतिले बराबरी नतिजाबाट सन्तुष्ट रहेको बताए ।
प्रतिक्रिया दिनुहोस !
