काठमाडौं : प्रथम नोभिस राष्ट्रिय बक्सिङ प्रतियोगितामा नक्साल बक्सिङ क्लब टिम च्याम्पियन भएको छ । आइतबार सम्पन्न प्रतियोगितामा नक्साल चार स्वर्ण र ६ रजत पदक जित्दै टिम च्याम्पियन बनेको हो । प्रतियोगितामा काठमाडौं बक्सिङ क्लब दोस्रो भयो । काठमाडौंले दुई स्वर्ण जित्यो ।
महिला यू–२४ को ४८ केजीमुनि धनकुटाकी बिस्मिता राईले बक्समान्डुकी सपना गुरुङलाई हराउँदै पहिलो भइन् । सोही उमेर समूहको ५७ केजीमुनि अल्फा टे«निङ सेन्टरकी लक्ष्मी घर्तीमगरले नक्सालकी शिवानी श्रेष्ठलाई हराउँदै उपाधि जितिन् ।
पुरुष यू–२४ को ४९ केजीमुनि काठमाडौं बक्सिङ क्लबका दिपेश राई सुनसरीका विशाल राईलाई हराउँदै पहिलो भए । ५२ केजीमुनि ललितपुरका बुद्धग्याम्जो लामाले केन्द्रीय बक्सिङ क्लबका जीवनकुमार पुनलाई तथा ५६ केजीमुनि भक्तपुरका सुजन पौडेलले कास्कीका पुरन रास्कोटीलाई हराउँदै पहिलो स्थान हात पारे ।
पुरुषकै ६० केजीमुनि नक्सालका मौसम रानामगरले जिमखानाका करण वज्राचार्यलाई तथा ६४ केजीमुनि कास्कीका पवन गुरुङले नक्सालका विवेकवीर सिंहलाई हराउँदै स्वर्ण जित्न सफल भए । ६९ केजीमुनि रेज फिटनेसका कोसिस श्रेष्ठले जिमखानाका अनमोल घलेलाई तथा ७५ केजीमा दाङका गणेश विकले टीकाथलीका प्रिन्स खड्कालाई पराजित गरे । पुरुषकै ८१ केजीमुनि कञ्चनपुरका मायाप्रकाश पन्तले बोसीगाउँका प्रशान्त महर्जनलाई पाखा लगाउँदै स्वर्ण जिते ।
महिला यू–१९ को ४८ केजीमा नक्सालकी रमिसा श्रेष्ठले अल्फाकी सुशीला थापालाई हराउँदै स्वर्ण जितिन् । ५१ केजीमा नक्सालकै सुमिना खड्काले सोही क्लबकी तेजी गुरुङलाई हराइन् । ५४ केजीमा बानुजकी संज्ञा लोहनीले नक्सालकी लाक्पाडिकी शेर्पालाई हराइन् भने ६० केजीमा नक्सालकी एलिसा खड्गीले मेघदूतकी शिवानी श्रेष्ठलाई पराजित गरिन्् ।
पुरुष यू–१९ को ४९ केजीमा मकवानपुरका जीवन पाख्रिनले नक्सालका रविन थापालाई पराजित गर्दै स्वर्ण जिते । ५२ केजी तौलको उपाधि भिडन्तमा नक्सालका अमर गुरुङले कैलालीका निर्मल सुवेदीलाई पराजित गरे । ५६ केजीमा नक्सालका अमन ओलीले बक्समान्डुका आशिष तामाङलाई पराजित गरे । ६० केजीमा बाँकेका इन्द्रबहादुर सुनुवारले नक्सालका सन्देश राजभण्डारीलाई पाखा लगाउँदै स्वर्ण जिते । ६४ केजी तौल समूहमा काठमाडौं बक्सिङ क्लबका योमेस तामाङले बोसीगाउँका रजित महर्जनलाई पराजित गर्दै स्वर्ण जिते ।
प्रतिक्रिया दिनुहोस !
