रुकुम पश्चिम पुगेर बाबुरामले भने : वर्तमान सरकार पुरै असफल

रुकुम पश्चिम : पूर्व प्रधानमन्त्री तथा नयाँ शक्ति नेपालका संयोजक डा. बाबुराम भट्टराईले वर्तमान सरकारको एक बर्षे समिक्षामा पुर्णतः असफल भएको आरोप लागाएका छन् । सरकारले सुशासन कायम गर्ने कुरामा सरकार चुकेको भन्दै भट्टराईले यो सरकारको पालामा भ्रष्ट्राचार, अनियमितता बढेर गएको बताएका छन् ।

नयाँ शक्ति पार्टीद्वारा सञ्चालित जनसम्वाद यात्राका सन्दर्भमा मध्यपहाडी (पुष्पलाल) लोकमार्ग यात्राका क्रममा बुधबार रुकुम पश्चिमको सदरमुकाम मुसीकोट खलंगामा पुगेका डा. भट्टराईले सरकारको कडा आलोचना गरेका हुन् ।

केपी ओली नेतृत्वको वर्तमान सरकारले एनसेल प्रकरण हल गर्न नसकेको, वाइडबडी जहाज खरिद प्रकरणमार मुछिएको र बूढीगण्डकी जलविद्युत् आयोजना आफैँले बनाउने भनेर कमिसनको खेलमा भकुण्डो खेले जस्तो पछि हटेको आरोप उनले लगाए । 

आफु अर्थमन्त्री हुदाँको परिकल्पना गरिएको मध्यपहाडी लोकमार्ग आसपासका जनताको जनजीविका र यहाँको राजनैतिक अवस्था अवलोकन गर्न यात्रामा निस्केको बताउँदै उनले तत्कालिन माओवादीमा रहँदा उठाएका राजनैतिक सवाल नछाडेको पनि बताएका छन् । 

‘युद्ध सुरु गर्नुभन्दा पहिला पनि म यही तरिकाले घुमेको थिएँ । त्यही आधारमा हामीले ४० सूत्रीय मागसहित युद्ध सुरुवात गरेका थियौँ,’ भट्टराईले भने, ‘जनयुद्धताका उठाएका धेरैमध्ये राजनैतिक माग पुरा भएपनि राष्ट्रियतासम्बन्धी माग विस्तारै पुरा हुन्छ । अहिले हामी आर्थिकरुपमा जनजीविकासँग जोडिएका माग पुरा गर्ने चरणमा छौँ  ।’

मध्यपहाडी क्षेत्रका स्थानीय सरकार र तिनको अवस्थाबारे आफूले अन्तरक्रिया गरेको बताउँदै डा. भट्टराईले वर्तमान स्थानीय सरकारबाट जनता असनतुष्ट पाएको पनि बताएका छन् । 

आफुहरुले युद्धताका देखे भोगेका धेरै कुरा अहिले पनि उही अवस्थामा रहेको भन्दै उनले जनताका आधारभूत आवश्यक पनि पुरा नहुनु दुःखद भएको बताएका छन् । माघ १५ गतेदेखि सुरु भएको जनसम्बाद यात्रा फागुन १५ गते सकिनेछ ।