ललितपुर : ललितपुरस्थित एक युवा क्लवले ‘जेष्ठ नागरिक मिलन केन्द्र’को सुरुवात गरेको छ । जावलाखेलको सरस्वती युवा क्लबले वडा नम्बर ३ सँगको सहकार्यमा मिलन केन्द्रको सुरुवात गरेको हो ।
जावलाखेलमै रहेको सरस्वती मन्दिरसँगै खुलेको उक्त ज्येष्ठ नागरिक मिलनकेन्द्रमा ईच्छुक सबै वृद्धवृद्धाहरु आउनसक्ने संयोजक तुलसी प्रसाद न्योैपानेले जानकारी दिए ।
न्यौपानेका अनुसार पहिलादेखि नै रहेको क्लवको जग्गामा वृद्धवृद्धाका लागि समय बिताउने ठाउँ बनाइएको हो । मिलनकेन्द्रमा आएर वृद्धवृद्धाहरु सुखदुखका कुरा साटासाट गर्न र टहलिन सक्छन् ।
यहाँ ठूलो बगैंचा पनि छ । पीपल र रुद्राक्ष्यका छहारीमा बसेर वृद्धवृद्धाहरु गफगाफ गर्न सक्छन् । उनीहरुका लागि चियाको व्यवस्था पनि गरिने न्यौपानेले बताए । साथै पत्रपत्रिका र टेलिभिजन पनि यहाँ उपलब्ध हुने बताइएको छ । टेलिभिजनमा बृद्धबृद्धाहरु चाहेको कार्यक्रम हेर्न सक्छन् ।
यस्तै भित्र खेल्ने (इनडोर) खेल पनि खेल्नसक्ने छन् । न्यौपानेले भने, ‘उनीहरुको सम्पूर्ण व्यवस्थापनका लागि एउटा परिवार नै खटिएको छ ।’ ज्येष्ठ नागरिक मिलनकेन्द्रका समितिमा रहेका तिलक बहादुर थापाका अनुसार वृद्धवृद्धाका व्यक्तिगत तथ्यांक संकलन गर्ने र आर्थिक अवस्था कमजोर भएकालाई सहयोग गर्ने पनि योजना छ ।
यसका लागि वडा कार्यालयले एक लाख रुपैयाँ बजेट छुटयाएको छ भने अन्य क्लव, अथवा व्यक्तिगत रुपमा पनि सहयोग मिलेको बताइएको छ ।
प्रतिक्रिया दिनुहोस !
