रुकुमपूर्व : नेत्रविक्रम चन्द विप्लव नेतृत्वको नेपाल कम्युनिस्ट पार्टी (नेकपा) रुकुमपूर्वका जिल्ला इन्चार्ज कर्णबहादुर नकाल (शिशिर) लाई प्रहरीले पक्राउ गरेको छ। रुकुम पश्चिमको सानीभेरी गाउँपालिका ३ गरायला मुलपानीबाट नकाललाई पक्राउ गरिएको जिल्ला प्रहरी कार्यालय रुकुम पश्चिमले जनाएको छ।
सानीभेरी गाउँपालिका –३ गरायला र सिम्ली लगायतका स्थनमा प्रतिबन्धित नेकपा विप्लव समूहका कार्यकर्ता लुकीछिपि बसेको गोप्य सूचनाको आधारमा खटिएको टोलीले मंगलबार बिहान पक्राउ गरेको जिल्ला प्रहरी कार्यालय रुकुम पश्चिमका प्रमुख प्रहरी नायव उपरीक्षक सुमित खड्काले बताए।
पक्राउ परेका नकाल तत्कालीन जनमुक्ति सेनाका पूर्व ब्रिगेड कमान्डर हुन्। नियन्त्रणमा लिने क्रममा नकालले प्रहरीलाई अश्लिल गालीगलौज तथा हातपात गरेको प्रहरीको दाबी छ।
उनलाई जिल्ला प्रहरी कार्यालय रुकुम पश्चिमको हिरासतमा राखी थप अनुसन्धान भइरहेको प्रहरीले जनाएको छ।
प्रतिक्रिया दिनुहोस !
