सिन्धुली : ४७औं विश्व वातावरण दिवसको अवसरमा सिन्धुलीको सनुकोसी गाउँपालिकाले वृक्षरोपण र सरसफाई गरी सवारी साधनमा सरसफाई स्टिकर टाँसेको छ ।
गाउँपालिकाको सुख्खा क्षेत्रलाई हराभरा बनाउँदै आयआर्जन समेत गर्ने उद्देश्यले सुनकोसी गाउँपालिकामा एक घर एक वृक्षरोपणका लागि ७ हजार विभिन्न जातका फलफूलका बिरुवा रोपिएको हो ।
प्रदेश नम्बर ३ का सांसद राजन दाहालले बुधबार गाउँपालिकामा आयोजित एक कार्यक्रममा गाउँपालिकाका ७ वटै वडाका ६ हजार ९ सय घरधुरीलाई न्युनतम एक फलफूलका बिरुवा वितरण गरेका हुन् ।
यस्तै एक सय बढी फलफूलका विरुवाहरु गाउँपालिका क्षेत्र तथा अन्य सार्वजनिक कार्यालयको क्षेत्रमा वृक्षारोपण गरिएको गाउँपालिकाकी अध्यक्ष दीपा बोहोरा दाहालले बताइन् ।
आँप, लिची, कटहर, सिनकौली, अम्बा, कागती, धुपी लगायत विभिन्न एक दर्जनबढी जातका फलफूल लगायत विरुवा वितरण तथा वृक्षारोपण गरिएको उनले बताइन् ।
यस्तै पूर्वाबाट काठमाडौं भित्रने र बाहिरिने सवारी साधनका कारण राजमार्गमा अत्याधिक फोहोर बढेको भन्दै गाउँपालिकाले आफ्नो क्षेत्रभित्र सबै सवारी साधनबाट निस्कने फोहोरलाई अनिवार्य डस्टवीनमा हाल्न र सरसफाईमा ध्यान दिन भन्दै सयौं सवारी साधनमा सरसफाई सम्बन्धी स्टीकर टाँसेको छ । समुदाय–प्रहरी साझेदारी कार्यक्रम अन्तरगत गाउँपालिकाले एक हजार भन्दा बढी सावरी साधनमा सूचनामुलक स्टीकर टाँसेको बताइएको छ ।
प्रतिक्रिया दिनुहोस !
