ललितपुर : शुक्रबार बिहान ११ बज्दै थियो। ललितपुरको जावलाखेल तरकारी बजारमा आफ्नै खालको चहलपहल थियो। पसलेहरु तरकारी तथा फलफूल बेच्न व्यस्त थिए। एकाएक साइरनसहितको प्रहरी भ्यान अनि डोजर देखेपछि तरकारी पसलेहरु अचम्मित भए। गाडीबाट ओर्लेर एकजना प्रहरीले आदेशको शैलीमा भने, 'ल तपाईँहरु हट्नुस् यहाँ डोजर चल्छ।'
त्यसपछि डोजर चलाउन थालियो। पसलेहरुलाई बलपूर्वक हटाइयो। पूर्व जानकारीबिना आफूहरुलाई जबरजस्ती हटाइएको भन्दै रोइकराइ गरे। तर डोजर रोकिएन।
तरकारी तथा फलफूल बजारमा डोजर अप्रेशन निरीक्षणा ललितपुरका प्रमुख जिल्ला अधिकारी प्रेमराज जोशी पनि आफै पुगेका थिए। त्यहाँ पुगेका प्रजिअ जोशीले पहिले नै पटकपटक ताकेता गर्दा पनि अटेर गरेपछि डोजर चलाउनुपरेको अन्नपूर्णसँग बताए।
जावलाखेलको सार्वजनिक जग्गामा ०५२ साल देखि बनाएर त्यहाँ तरकारी तथा फलफूल बजार संचालन हुँदै आएको थियो। उनीहरुले पसल संचालन गरे बापत जावलाखेल क्लबलाई भाडा बुझाउँदै आएका थिए।
विस्थापित पसलेले सार्वजनिक जग्गा हडप्ने नियत आफूहरुको नभएको तर पूर्व जानकारीबिना टहरा भत्काउँदा आफ्नो रोजीरोटीको आधार खोसिएको बताए।तरकारी पसले रामबहादुर शर्माले भने, हाम्रो पेटमाथि डोजर चलाइएको पीडा भएको छ।'
प्रतिक्रिया दिनुहोस !
