मुगु : छयाँनाथ रारा नगरपालिका-१४ बाम रोल्का गाउँमा शनीबार राती आगलागी भएको छ । आगलागीमा दुई घरका ७० बाख्रा जलेर मरेका छन् । स्थानीय दानबहादुर बढुवाल र तिर्थ बुढाको घरमा आगलागी हुँदा गोठमा रहेका ७० बाख्रा जलेर मरेको जिल्ला प्रहरी कार्यलय मुगुले जानकारी दिएको हो ।
आगलागी भएको स्थान सदरमुकाम गमगढीबाट ४ घण्टा टाढा भएको र आगलागीको जानकारी आइतबार मात्रै आएकाले घटनाबारे बुझ्न प्रहरी घटना स्थलतर्फ जाँदै गरेको प्रहरीले बताएको छ । आगलागीबाट ७० बाख्रा र दुई घर जलेको जानकारी प्राप्त भएको छ ।
मानवीय क्षति भने नभएको जिल्ला प्रहरी कार्यलय मुगुका प्रहरी नायव उपरीक्षक भुवनेश्वरप्रसाद साहाले बताएका छन् ।
दानबहादुर बुढाका ७० बाख्रा र १५ क्वीन्टल स्याउ, २० हजार नगद, अन्नपात लत्ता कपडा, भाँडाकुडा, नागरिकता जलेको र तिर्थ बुढाका ९० हजार नगद, १५ क्वीन्टल स्याउ, १० वटा कुखुरा, १ सय ४० लिटर डिजेल, खरायो, अन्नपात लत्ता कपडा , भाँडा जलेर नष्ट भएको आगलागी पिडितले जानकारी दिएका छन्।
प्रतिक्रिया दिनुहोस !
