गोरखा : नेत्रविक्रम चन्द ‘विप्लव’ समूहका गोरखा जिल्ला सेक्रेटरीसहित दुईजनालाई प्रहरीले नियन्त्रणमा लिएको छ ।
दाङको तुलसीपुर उपमहानगरपालिका ५ स्थायी घर भइ केही समयदेखि ंगोरखामा सो समूहका जिल्ला सेक्रेटरीको जिम्मेवारी सम्हालिरहेका लोकबहादुर वली ‘दिनेश’ र गण्डकी गाउँपालिका ४ ढावे स्थायी घर भइ सो समूहका जिल्ला सदस्य तथा गण्डकी गाउँपालिका इञ्चार्जको जिम्मेवारी सम्हालेका कृष्ण पन्तलाई पक्राउ गरिएको प्रहरी उपरीक्षक ओम अधिकारीले जानकारी दिए ।
सहिद लखन गाउँपालिका ६ घैरुङमा जनयुद्ध दिवस मनाएर फर्कँदै गरेको अवस्थामा शुक्रबार पृथ्वीराजमार्गको मुग्लिन आसपासबाट नियन्त्रणमा लिइएको प्रहरीले जनाएको छ ।
लामो समयदेखि खोजीको सूचीमा रहेका उनीहरुलाई लुकिछिपी रहेको अवस्थामा पक्राउ गरिएको एसपी अधिकारीले बताए । उनीहरुको साथबाट सो समूहको राजनीतिक प्रतिवेदन, पार्टीको झण्डा, चन्दा रसिद प्याड, संकलित चन्दा नगद ३२ हजार, मोबाइल तीन थान र सिम कार्डहरु बरामद गरी अनुसन्धान भइरहेको उनले बताए ।
प्रतिक्रिया दिनुहोस !
