सन्धिखर्क : अर्घाखाँचीको छत्रदेव गाउँपालिकाले सबै क्वारेन्टाइन र आइसोलेसन स्थलहरूमा एमबीबीएस डाक्टर राखेको छ । स्थानीयतहले मापदण्डबिना नै क्वारेन्टाइन निर्माण गरेको आरोप लागेपछि छत्रदेवले डाक्टर सहितको क्वारेन्टाइन निर्माण गरेको हो ।
पाँच ओटा क्वारेन्टाइन स्थलमा ३८ बेड र एक आइसोलेसन स्थलमा ४ बेड पालिकाले निर्माण गरेको छ । ७ जना एमबीबीएस डाक्टरले ती स्थलमा सेवा दिइरहेका छन् ।
शारजहाँ विमानस्थल हँदै धनगढीका एकजना कोनोना संक्रमितसँग युएईबाट एउटै फ्लाईटमा आएका छत्रदेव गाउँपालिकाका दुई जनासहित भारत तथा तेस्रो मुलुकबाट आएका २४ जनालाई क्वारेन्टाइनमा राखिएको गाउँपालिका अध्यक्ष लेखनाथ पोख्रेलले जानकारी दिए । ‘हाम्रो पालिकामा ७ जना एमबीबीएस डाक्टर उपलब्ध छन् । सबै क्वारेन्टाइनमा ती डाक्टरले सेवा दिइरहेका छन्', उनले भने, ‘आवश्यकताका आधारमा अन्य पालिकामा पनि डाक्टर र प्राविधिक टोली पठाउन सक्छौं ।’ कुनै स्थानीयतहभन्दा सेवामा कम नरहेको उनले बताए ।
पालिकाले क्वारेन्टाइनमा बसेकालाई चिसोतातो पानी, वाईफाई, टेलिभिजन लगायतको सुविधा दिएको छ । मास्क, स्यानिटाईजर र ग्लब्स पनी पर्याप्त मात्रामा छन् । तीनओटा क्वारेन्टाईन स्थलमा हेलिप्याडकोसमेत सुविधा रहेको र तीनओटा एम्बुलेन्स ल्याउने तयारी गरिएको उनले बताए ।
सचेतनाका लागि पनी विभिन्न प्रयास भइरहेको पालिकाका प्रमुख प्रशासकीय अधिकृत खिमानन्द भुसालले जानकारी दिए । ‘कोरोना संक्रमणबाट बच्ने उपाय सहितका संदेशमूलक सूचना टोलटोलमा माइकिङ्ग गरिरहेका छौं', उनले भने, ‘छ पेजको संदेशमूलक ब्रुसर र अनुरोधपत्र समेत घरघरमा पुर्याएका छौं ।’ सचेतना फैलाउन कुनै कसर बाँकी नराखेको उनको भनाइ छ ।
आकस्मिक सेवाका लागि पालिका अध्यक्षको नेतृत्वमा प्रमुख प्रशासकीय अधिकृत, राजनैतिक क्षेत्रका प्रतिनिधि, मेडिकल टोली सहभागी रहेको मोबाइल टोली बनाएर सेवा प्रदान गरिएको प्रमुख प्रशासकीय अधिकृत खिमानन्द भुसालले बताए । तीन एम्बुलेन्सका अलावा सेवाका लागि दुई पालिकाका गाडी तयारी अवस्थामा राखिएको उनले बताए ।
अहिले जिल्लाका स्थानीय तह क्वारेन्टाइन निर्माणमा जुटेका छन् । जिल्ला विपद व्यवस्थापन समितिको बैठकमा सबै स्थानीय तहमा क्वारेन्टाइन कक्ष निर्माण गर्ने निर्णय भएपछि स्थानीय सरकार पनि क्वारेन्टाइन कक्ष निर्माणमा जुटेका हुन् ।
अहिलेसम्म जिल्लाका ६ स्थानीय सरकारको पहलमा ४ सय ५७ क्वारेन्टाइन कक्ष निर्माण भइसकेका छन् । अरु पनि थप गरिँदै छ । प्रत्येक वडामा पर्ने गरी क्वारेन्टाइन कक्ष निर्माणमा उनीहरू जुटेका हुन् ।
सरकारले लकडाउन गर्नुअघि जिल्लामा भारत तथा अन्य देशबाट १९ सय १९ जना भित्रिए । स्थानीय सरकार र सुरक्षा निकायले सबैलाई होम क्वारेन्टाइनमा बस्न आग्रह गरे पनि जिल्लाभर ३५ जना क्वारेन्टाइनमा र १३ जना होम क्वारेन्टाइनमा बसेको सहायक प्रमुख जिल्ला अधिकारी विष्णुराज वेल्वासेले बताए ।
प्रतिक्रिया दिनुहोस !
