अछाम : सुदुरपश्चिम प्रदेशमा कोरोना भाइरसको सक्रमितको संख्या बढेपछि सरकारले पठाएको ३३ जना चिकित्सकको टोलीलाई विभिन्न जिल्लामा खटाइएको छ । त्यसमध्ये डाक्टर सरदचन्द्र बरालको नेतृत्वमा अछाममा ६ जना डाक्टरको टोली आइतबार आइपुगेको छ ।
जिल्लामा कोरोना रोकथाम,उपचार तथा व्यवस्थापनका लागि ६ जना चिकित्सकको टोली पुगेको स्वास्थ कार्यालय अछामका प्रमुख झनक ढुंगानाले जानकारी दिए । अछाम अस्पताललाई कोरोना विषेश अस्पताल बनाएपछि डाक्टरको टोली अछाममा सरकारले खटाएको ढुंगानाले बताए । टोलीमा डा. मोहन नाथ, डा.धर्मराज रेग्मी, डा.मिलन सिलवाल, डा. क्षितिज सापकोटा, डा. बिष्णु खतिवडा रहेका छन् ।
सुदूरपश्चिममा कोरोना भाइरसको जोखिम बढेको भन्दै त्यसलाई न्यूनीकरण गर्न संघीय सरकारले चिकित्सकको टोली सुदूरपश्चिम पठाइएको थियो । खटाइएका स्वास्थ्यकर्मी अहिले एमडिएमएस गर्ने सबै जना सरकारको छात्रवृत्तिमा पढ्छन् । सरकारले यसअघि नै छात्रवृत्तिमा पढेका स्वास्थ्यकर्मीलाई कोरोना उपचार र रोकथाममा खटाउने निर्णय गरेको थियो।
चिकित्सको टोली जिल्लामा एक महिनासम्म रहेर काम गर्ने बताइएको छ । यसैबीच जिल्ला अस्पताल मंगलसेनले स्वास्थकर्मीको टोलीलाई फूलमाला लगाएर स्वागतसमेत गरेको छ ।
प्रतिक्रिया दिनुहोस !
