दैलेख : कोरोना भाइरस (कोभिड–१९) को संक्रमण रोकथाम तथा नियन्त्रणका लागि नेपाल र भारत सरकारले लकडाउन अवधि बढाएपछि भारतमा सयौं नेपाली अलपत्र परेका छन् । स्वदेश आउने क्रममा रहेका र त्यहाँ रहेका नेपालीहरु समस्यामा परेका हुन् ।
भारतको उत्तराखण्ड प्रदेशको अल्मोडा जिल्लाका विभिन्न क्षेत्रमा काम गर्ने नेपाली स्वदेश फर्कन नपाइ बीच बाटोमै अलपत्र परेका छन् । तीमध्ये दैलेख, सुर्खेत र बाँकेका गरी ९० जना अलपत्र परेका छन् । दैलेखको गुराँस गाउँपालिकाका विभिन्न वडाका ८४ जना, बाँकेको बैजनाथ गाउँपालिकाका २ जना र सुर्खेतको चिङ्गाड गाउँपालिकाका ४ जना अलपत्र परेको बताइएको छ ।
मजदुरीका लागि गएका उनीहरु भोकभोकै बस्न बाध्य छन् । आफूहरुलाई स्वदेश फर्किने वातावरण मिलाइदिन नेपाल सरकारसँग आग्रह गरेका छन् । ‘कोरोना रोगलेभन्दा पनि भोकले मर्नुपर्ने भयो,’ गुराँस गाउँपालिकाका खड्क विकले भने, ‘न बस्ने ठाउँ छ न त पेट भर्नलाई खाद्यान्न ।’ नेपाल आएर सरकारको मापदण्ड अनुसार क्वारेन्टाइनमा बस्न तयार रहेको उनीहरुले बताएका छन् ।
‘सरकारले कुटनैतिक पहल गरिदिए हामी सुरक्षित नेपाल आउन पाउने थियौँ', गुराँस गाउँपालिका–७ का नन्द बिसीले भने । घरमा कमाउने मान्छे उत्तराखण्ड प्रदेशको अल्मोडामै अड्किएपछि घर परिवार समेत समस्यामा परेका छन् ।
भारतमा अलपत्र परेका नेपाली नागरिकहरुको उद्दारको पहल भइरहेको कर्णाली प्रदेश सांसद धर्मराज रेग्मीले बताए । लकडाउनका कारण समस्या भोगिरहेको दैलेखका नागरिकको उद्दार र राहत उपलब्ध गराउन सरकारको ध्यानाकर्षण गराएको सांसद रेग्मीले बताए । भारत सरकारसँग कुटनैतिक पहल गरेर भारतका विभिन्न क्षेत्रमा अलपत्र रहेका नेपालीहरुको अवस्थाबारे नेपाल सरकारले उचित समन्वय र सुरक्षामा शीघ्र पहलकदमी बढाउनुपर्ने उनको भनाइ छ ।
यता जिल्ला प्रशासन कार्यालय दैलेखले भारतको उत्तराखण्ड प्रदेशको अल्मोडा जिल्लामा अलपत्र परेका ९० जनाकै विवरण संकलन गरी गृह मन्त्रालयमा पठाइसकेको छ । आवासविहीन र भोजनविहीन भइ अलपत्र परेका नागरिकहरुको सहज जीवनयापनका लागि आवश्यक पहल गर्न अलपत्र परेकाहरुको विवरण संकलन गरी पठाइएको जिल्ला प्रशासन कार्यालय दैलेखले जनाएको छ ।
प्रतिक्रिया दिनुहोस !
