धनकुटा : जिल्लाको सहिदभूमि गाउँपालिमा एउटा पनि एम्बुलेन्स छैन । कोही स्थानीय बिरामी परे सदरमुकामस्थित जिल्ला अस्पताल वा धरानस्थित वीपी कोइराला स्वास्थ्य विज्ञान प्रतिष्ठानसम्म पुर्याउन उतैबाट एम्बुलेन्स बोलाउनुपर्ने वाध्यता छ ।
साविकका खोकु, छिन्ताङ र आँखिसल्ला गाविसलाई समेटेर सहिदभूमि गाउँपालिका बनाइएको हो । गाउँपालिमा ७ वटा वडा छन् । गाउँपालिका भरिका सवै वडामा सडक संजाल विस्तार भएपनि बाटो कच्ची छ । अधिकांश सडक हिउँदमा धुलाम्मे र वर्खामा हिलाम्ये हुन्छन् । बाहिरबाट एम्बुलेन्स बोलाए पनि बाटोको अवस्था बुझेर मात्र आउने गरेको स्थानीयको भनाइ छ । कतिपय त आउनै मान्दैनन् ।
कोही बिरामी परे गाउँघरमा गुड्ने पिकअप, टाटासुमो जस्ता सवारी साधन रिजर्भ गरेर अस्पतालसम्म लैजानुपर्ने वाध्यता रहेको सहिदभूमि गापा-२ का वडा समिति सदस्य समेत रहेका स्थानीय सोम राना मगरले बताए ।
गर्भवती महिलालाई अस्पतालसम्म पुर्याउन सदरमुकामदेखि एम्बुलेन्स मगाउनुपर्ने वाध्यता छ । उनका अनुसार पिकअप, सुमोजस्ता गाडी रुटमा कुदिरहेका हुन्छन् ।तर समयमै नपाउँदा केही समय पर्खिनुपर्छ । गाडी भाडा पनि महंगो पर्छ ।
सबैजनाको महंगो भाडा तिरेर अस्पताल लैजाने आर्थिक क्षमता हुँदैन । हिँडाएरै भएपनि जानुपर्ने वाध्यता हुन्छ । गाउँमै एम्बुलेन्स भए बिरामीलाई छिटो अस्पतालसम्म पुर्याउन सकिन्थ्यो।
पिकअप र सुमोजस्ता गाडी बिरामीमैत्री हुँदैनन् । उनीहरुको सिट बिरामी बस्ने खालको हुँदैन । बिरामीलाई अस्पताल सम्म पुर्याउन असहज हुन्छ । गाउँपालिकाको बैठकमा एम्बुलेन्स खरिद विषयमा कुरा राखिएको मगरको भनाइ छ । प्रदेश सरकारवाट एम्बुलेन्स आउने कुरा थियो । हालसम्म पनि आएन । अब गाउँपालिकाले नै खरिद गर्ने योजना तथा कार्यक्रममा राख्ने गरी पहल भइरहेको उनले बताए ।
बाटोको समस्याको कारण एम्बुलेन्स आउन नमान्ने गरेको छिन्ताङका स्थानीय मातृका राईले बताए । गाउँपालिकाले एम्बुलेन्स खरिद गर्ने तयारी गरिरहेको जानकारी आफूले थाहा पाएको उनको भनाई छ ।
वर्षाले बाटो हिलाम्ये भएर एम्बुलेन्स आउन नसक्दा केही दिनअघि मात्रै सफाइधापस्थित आर्दश माविको क्वारेन्टाइनमा रहेका कोरोना संक्रमित व्यक्तिलाई धरानस्थित वीपि कोइराला स्वास्थ्य विज्ञान प्रतिष्ठान पुर्याउन साप्तिङटारसम्म गाउँपालिकाको ट्याक्टर लगिएको थियो । संक्रमित बिरामी ल्याउन आएको एम्बुलेन्स बाटो खराब भएको कारण साप्तिङ्टार मै रोकिएको थियो ।
यता सहिदभूमि गाउँपालिका अनुसार आगामी वर्षको योजना तथा कार्यक्रममा एम्बुलेन्स खरिद गर्न बजेट विनियोजन गर्ने जनाएको छ। प्रदेश १ को आन्तरिक मामिला मन्त्रालयले यसै चालु आवमा गाउँपालिकालाई एम्बुलेन्स दिने तयारी गरेको थियो । प्रदेश सरकारले एम्बुलेन्स खरिद प्रक्रियामा रहेको र आउने वित्तिकै हस्तान्तरण गरिने छ।
आँखिसल्लाको थलथले बजारमा हेल्थपोस्ट छ । त्यहाँ वर्थिङ सेन्टर पनि छ। त्यहाँ जानुपरे अरुको गाडीको भर पर्नुपर्ने बाध्यता छ।
प्रतिक्रिया दिनुहोस !
