वीरगन्ज : वीरगन्जको कोभिड अस्पतालमा आइतबार बिहान मृत्यु भएका बृद्धको पीसीआर रिपोर्ट पनि पोजिटिभ आएको छ ।
आरडिटी रिपोर्ट पोजिटिभ देखिएका मृतक बृद्धको पीसीआर रिपोर्ट पनि पोजिटिभ आएको नारायणी अस्पतालका प्रमुख मेडिकल सुपरिडेन्टेन्ड (मेसु) डा. मदन उपाध्यायले पुष्टि गरेका हुन् ।
नारायणी अस्पतालको प्रयोगशालबाट आइतबार साँझ प्राप्त रिपोर्टमा मृतक बृद्धमा कोरोना संक्रमण पुष्टि भएको उनले बताए ।
वीरगन्ज १० आदर्शनगरका व्यापारी रहेका ६५ वर्षीयको कोभिड अस्पतालको आइसोलेशनमा उपचारका क्रममा आइतबार बिहान साढे ६ बजे मृत्यु भएको थियो । यसअघि वीरगन्ज हेल्थ केयर अस्पतालमा गरिएको आरडिटी परीक्षणमा उनको एन्टीबडी रिपोर्ट पनि पोजिटिभ आएको थियो ।
पहिलेदेखि नै मुटु र मधुमेहको रोगी रहेका बृद्धलाई स्वास्थ्यमा समस्या भएपछि शनिबार दिउँसो नारायणी अस्पतालमा उपचारका लागि लगिएको थियो । अस्पतालको आकस्मिक कक्षमा भर्ना गरिएका उनमा कोरोनाको शंका लागेर स्वाब संकलन गरी नारायणीकै प्रयोगशालामा पठाइएको थियो ।
त्यसपछि उनलाई आइतबार नै वीरगन्जको हेल्थ केयर हस्पिप्टलमा लगेर भर्ना गरिएको थियो । त्यहाँ उपचारका क्रममा उनको आरडिटी परिक्षण गर्दा रिपोर्ट पोजिटिभ रिपोर्ट आएको थियो । स्वास्थ्य अस्वस्था जटिल बन्दै गएपछि बृद्धलाई शनिबार राति ८ बजे गण्डकस्थित कोभिड अस्पतालमा लगेर भर्ना गरिएको थियो ।
राति ११ बजे तिर स्वास्थ्य अवस्था झन् जटिल बन्दै गएपछि उनलाई कोभिड अस्पतालकै भेन्टिलेटरमा राखिएको र उपचारका क्रममा आइतबार बिहान साढे ६ बजे तिर उनको मृत्यु भएको कोभिड अस्पतालका डा. उदयनारायण सिंहले जानकारी दिए । मृतकको पीसीआर रिपोर्ट आइनसकेकाले शव अस्पतालमै आइशोलेट गरेर राखिएकोमा आइतबार साँझ पीसीआर रिपोर्ट पनि पोजिटिभ आएको डा. सिंहले बताए ।
वीरगन्जमा अहिलेसम्म ८ जनाको मृत्यु
यससँगै वीरगन्जको कोभिड अस्पतालमा मृत्यु हुनेको संख्या ८ पुगेको छ । पर्साका सहायक प्रमुख जिल्ला अधिकारी ललित बस्नेतका अनुसार वीरगन्जमा अहिलेसम्म मृत्यु भएका ८ संक्रमितमध्ये पर्साका ३, बाराका ३ र रौतहटका १ जना थिए । वीरगन्जमा २ महिना पहिले वेवारिसे भेटिएका एक संक्रमितको भने अहिलेसम्म पनि पहिचान खुल्न सकेको छैन ।
वीरगन्जको कोभिड अस्पतालमा भर्ना रहेका ५४ मध्ये ४ जना संक्रमितको अवस्था जटिल रहेको अस्पतालका डा. सिंहले जानकारी दिए । वीरगन्जमा पछिल्लो समय संक्रमितको संख्या बढ्न थालेपछि कर्फ्यू लगाउनुका साथै मास टेस्ट पनि गर्न थालिएको छ ।
प्रतिक्रिया दिनुहोस !
