कपिलवस्तु : जिल्लामा दिनप्रतिदिन कोरोना संक्रमितको संख्या बढ्न थालेपछि स्थानीय प्रशासनले कपिलवस्तुमा १ हप्ताका लागि निषेधाज्ञा थप गर्ने निर्णय गरेको छ । आज जिल्ला प्रशासन कार्यालयमा प्रमुख जिल्ला अधिकारी दीर्घ नारायण पौडेलको अध्यक्षतामा जिल्ला कोरोना विपद् व्यवस्थापन समितिको बैठकबाट यस्तो निर्णय गरेको हो ।
स्थानीय प्रशासन ऐन २०२८ को दफा ६ (३) र संक्रामक रोग ऐन २०२० को दफा २ अनुसार भाद्र ७ गते राती १२ बजे सम्मका लागि जिल्लामा निषेधाज्ञा जारी गरिएको प्रमुख जिल्ला अधिकारी दिर्घ नारायण पौडेलले बताए ।
जिल्लामा कोरोना संक्रमणकै कारण २ जनाको मृत्यु भइसकेको र दैनिकजसो संक्रमितको संख्या बढ्दो क्रममा रहेका कारण संक्रमण फैलन नदिन बाध्यभइ निषेधाज्ञा जारी गर्नु परेको प्रजिअ पौडेलले बताए ।
निषेधाज्ञा जारी अवधिभर अतिआवश्यक सेवाका पसल तथा सवारी साधनबाहेक सबै बन्द हुने जनाइएको छ । मेडिकल, पानी, दूधजस्ता अतिवाश्यक वस्तुबाहेक सबै पसल व्यवसाय बन्द गर्ने निर्णय गरिएको छ । उद्योग तथा कलकारखानाको भने स्वास्थ्य मन्त्रालयले जारी गरेको स्वास्थ्य निर्देशिकाअनुसार सुरक्षा सर्तकता अपनाएर संचालन गर्न सकिने जिल्ला प्रशासन कार्यालयले जनाएको छ ।
दमकल, एम्बुलेन्स, शवबाहन, दूध, खानेपानीका गाडीबाहेक अन्य सबै निजी तथा भाडाका सवारी साधान संचालनमा पूर्ण रोक लगाइएको छ । राजमार्ग भएर गुड्ने गाडि जिल्लामा नरोकिने गरी भने चल्न पाउने छन् । तरकारी र खाद्यान्न खरिदका लागि हरेक दिन बिहान ८ बजेदेखि १० बजेसम्मको समय तोकिएको जिल्ला प्रशासन कार्यालयले जनाएको छ ।
प्रतिक्रिया दिनुहोस !
