जनकपुरधाम : प्रदेश २ मा बालबालिकाले आत्महत्या गर्ने दर बढेको छ । आर्थिक वर्ष २०७६÷०७७ मा २ सय २९ जना बालबालिकाले आत्महत्या गरेकोमा १ सय ४६ जना बालिका छन् । घरेलु हिंसा, यौनजन्य दुर्व्यवहार र अभिभावकको डरका कारण बालबालिका आत्महत्या गर्न बाध्य हुने गरेको पाइएको छ ।
झुन्डिएर सबैभन्दा बढी ६ सय ४ जना, विष खाएर २ सय जना, करेन्ट लाएर १२ जना, पानीमा हाम फालेर १९ जना, हातहतियार प्रयोग गरी २ जनाले आत्महत्या गरेका छन् । त्यस्तै आगो लगाएर आत्महत्या गर्नेहरू पनि छन् । बालबालिकामा बढ्दो आत्महत्या समाज विकासका लागि नराम्रो संकेत रहेको बालअधिकारका क्षेत्रमा कार्यरत अधिकारकर्मी सुरैत ठाकुर बताउँछन् । ‘हाम्रो समाजमा बालबालिकाको समस्यालाई खासै महत्व दिइँदैन ।
उनीहरूले घरमा वा घरबाहिर दुव्र्यवहारमा परेको बताए पनि अभिभावकले नपत्याउने र उल्टै बालबालिकालाई दोषी ठान्ने प्रवृत्तिा छ । यसले पनि आत्महत्या बढेको छ ।’ ठाकुरले भने, ‘पछिल्लो समय बालबालिकामा बढ्दो प्रेम, घरबाट भागेपछिको सामाजिक तिरस्कारले गर्दा पनि आत्महत्या बढेका छन् ।’
बालकमा भने लागूऔषधको सिकार भएपछि पनि आत्महत्या गर्ने गरेको पाइएको छ । आफ्ना बालबालिकामा फरक व्यवहार देखिनेबित्तिकै उनीसँग साथी जस्तै व्यवहार गरी समस्या पत्ता लगाउन आवश्यक रहेको ठाकुर बताउँछन् ।
‘कोरोना भाइरसको महामारीका बेला बालबालिका विद्यालय जान पाएका छैनन् । पढ्न, घुमफिर गर्न नपाउँदा दिक्क छन् ।
यस्तो बेलामा दुव्र्यवहारको सम्भावना बढी हुने हुँदा विशेष ध्यान दिन आवश्यक छ ।’ उनले भने ।
आर्थिक अभाव, बेरोजगारी, असफल प्रेम, र सोचे जस्तो काम नबन्नु जस्ता कारणले कतिपय व्यक्तिले आफूलाई असफल ठान्ने गरेको मनोविज्ञानकी प्राध्यापक रोहिनी झा बताउँछिन् । ‘मानसिक अस्वस्थता र नकारात्मक सोच उत्पन्न भएका बेला घरपरिवारबाट पनि सहयोग र माया, आवश्यक हुन्छ । एक्लोपनले निराशा बढाउँछ । यो मानसिक स्वास्थ्यका लागि हानिकारक छ ।’
प्रतिक्रिया दिनुहोस !
