कोरोना लागेपछि उपचार नपाएका मिर्गौला पीडितको पाँच दिनपछि डायलासिस
दमौली : संक्रमण देखिएयता सेवा लिन नपाएका व्यास ४ का कोरोना संक्रमितको डायलसिस गरिएको छ । ३६ वर्षीय उनको दमौली अस्पतालमा रहेको राष्ट्रिय मृगौला उपचार केन्द्रको शाखामै डायलसिस गराइएको हो ।
'दिउँसो अरु पनि सँगै हुने र बेग्लै ठाउँ नभएकाले सबै गएपछि राती डायलसिस गराएका हौं,'केन्द्रका प्रमुख शैलेन्द्र पण्डितले भने,'अब नियमित डायलसिस सेवा दिन्छौं ।'
गत शनिबारयता डायलसिस गराउन नपाएका उनमा संक्रमण देखिएपछि बेग्लै स्थान र श्रोत साधन अभाव भन्दै डायलसिस हुन सकेको थिएन । व्यास ३ दमौलीस्थित दमौली अस्पतालको आइसोलेसनमा बसेका उनीहरुलाई मंगलबार पोखराको पश्चिमाञ्चल अस्पताल पठाइए पनि त्यहाँका स्वास्थ्यकर्मीले खबरै नगरी आएको भन्दै फिर्ता पठाएका थिए ।
दमौली आएका उनलाई काठमाडौंको केन्द्रमा डायलसिसका लागि पठाउने दमौलीस्थित राष्ट्रिय मृगौला उपचार केन्द्रले तयारी गरे पनि बस्ने खाने ठाउँको व्यवस्था नहुने भनेपछि संक्रमित अप्ठेरोमा परेका थिए । संक्रमितकी श्रीमतीले बिरामी श्रीमान बोकेकर कहिले कता र कहिले कता जानुपर्दा अप्ठेरो परेको बताएकी थिइन् ।
खबर सार्वनिक भएपछि प्रशासनले अस्पतालमै व्यवस्थापन गरेर संक्रमितको डायलसिस गर्न भनेपछि अस्पतालले सामान राख्ने कोठामै वैकल्पिक व्यवस्था गरेर उनको बुधबार राती डायलसिस गराएको छ । बिहान साढे २ बजे डायलसिस गरेर फर्केपछि केही राहत महसुस गरेका छन्।