दमौलीः परिवारका केही सदस्यमा रुघा खोकीको समस्या देखिएपछि व्यास १० को एक परिवारका सदस्यलाई कोरोना संक्रमणको आशंका भयो । बिरामी परेका परिवारका १२ वर्षीया र २१ वर्षीयाले शुक्लागण्डकी नगरपालिकाको जीपी कोइराला राष्ट्रिय श्वासप्रश्वास केन्द्रमा गएर स्वाब दिए ।
गत आइतबार आएको नतिजामा दुवैमा संक्रमण भेटियो । दिदीबहिनी अहिले जीपीकै आइसोलेसनमा छन् । उनीहरुमा संक्रमण देखिएपछि परिवारका सदस्यको पनि परीक्षण गर्दा बुधबार बाँकी चारजनामा पनि संक्रमण भेटियो ।
चारमध्ये तीनजना एकै परिवारका र अर्का बालक आफन्त हुन् । ४८ वर्षका ती पुरुषसँगै उनका आफन्त पाँच वर्षका बालक, अनि १८ वर्षीया छोरी र ४१ वर्षीया पत्नीमा पनि बुधबार संक्रमण भेटिएको थियो । उनीहरुको प्रत्यक्ष सम्पर्कमा आएका छिमेकका अरु आफन्तमा भने संक्रमण भेटिएन ।
होम आइसोलेसनको तयारी
परिवारकै सबै सदस्यमा संक्रमण भेटिएपछि बाँकी संक्रमितलाई होम आइसोलेसनमा राख्ने तयारी गरिएको छ । 'दुईजना जीपीकै आइसोलेसनमा छन्,' वडाध्यक्ष तुलसीराम सापकोटाले भने, 'परिवारमै संक्रमण देखिएपछि उहाँहरुलाई घरमै आइसोलेसन राख्ने तयारी गरेका छौं ।'
उनीहरुको घर अरु भन्दा पर रहेको र सबै संक्रमित भएपछि घरभित्रै बसेर स्याहार गर्ने चाहना व्यक्त गरेकाले सामाजिक दुरीसहित घरमै आइसोलेसन बस्न दिइने वडाध्यक्ष सापकोटाले बताए । 'स्वास्थ्य मापदण्ड पालना गरेर जोखिम फैलन नदिन तत्काल विद्यालय नखोल्ने र अरु सजगता अपनाउने निर्णय गरेका छौं,' उनले भने ।
प्रतिक्रिया दिनुहोस !
