वीरगन्जमा स्कुल खुलेपछि विद्यार्थीलाई मास्क र सेनिटाइजर वितरण

वीरगन्ज : कोरोना महमारीको जोखीमका बीच सञ्चालनमा आएका विद्यालयमा अध्ययनरत विधार्थीहरुका लागि प्रतिनिधिसभा सदस्य (सांसद) प्रदीप यादवले मास्क र सेनिटाइजर वितरण गरेका छन् ।

पर्सा क्षेत्र नम्बर १ का सांसद यादवले वीरगन्ज महानगरमा सञ्चालनमा आएका विद्यालयहरुमा मास्क र सेनिटाइजर वितरण गरेका हुन् । उनले आफनो निर्वाचन क्षेत्रमा पर्ने १० वटा सामुदायिक विद्यालयमा अध्ययनरत प्रत्येक विद्यार्थीका लागि पुग्ने गरि मास्क र सेनिटाइजर बाँडेका हुन् ।

सांसद यादवले बुधबार ५ वटा र बिहीबार ५ वटा विद्यालयमा आफै पुगेर ८ हजार थान मास्क र सेनिटाइजर बाँडेका हुन् । सुरक्षित पठन पाठनको लागि सामुदायिक स्कुलहरूलाई मास्क र सेनिटाइजर वितरण गरेको उनले बताए ।

कोरोनाको महामारी विद्यमान रहेकै बेला विद्यालयहरु सञ्चालनमा आएकाले विद्यार्थीहरुलाई संक्रमणबाट जोगीन अपरिहार्य भएकाले मास्क र सेनिटाइजर बाडेको सांसद यादवले बताए ।
कोरोना महामारीका कारण विगत ७ महिनादेखि बन्द रहेका वीरगन्ज महानगरका सामुदायिक स्कुलहरु सोमबारदेखि सञ्चालनमा आएका छन् ।

वीरगन्ज महानगरपालिकामा आइतबार बसेको सरोकारवाहरुको बैठकले स्वास्थ्य सुरक्षाको मापदण्ड अपनाउँदै ८, ९ र १० कक्षाको मात्रै पठपाठन हुने गरी सामुदायिक विद्यालय सञ्चालन गर्ने निर्णय गरेपछि महानगरका ३१ वटा विद्यालय सञ्चालनमा आएका छन् ।

महानगरका नगर प्रमुख विजय सरावगीका अनुसार विद्यालयहरुले विधार्थीका लागि अनिवार्य रुपमा मास्क र विद्यालय प्रवेशद्धारमै थर्मल गनले विद्यार्थीको तापक्रम नाप्ने व्यवस्था गर्नु पर्नेछ । यस्तै कक्षा कोठामा भौतिक दूरी कायम गरेर मात्र विद्यार्थीलाई बस्ने व्यवस्था मिलाउनु पर्नेछ । विद्यार्थीहरुको साबुनपानीले हात धुनका लागि महानगरपालिकाले प्रत्येक विद्यालयमा २ थानका दरले रेडिमेड वास बेसन जडान गरिदिने नगर प्रमुख सरावगीले बताए ।