राजविराज: झुठा जाहेरी दिने र अदालतमा बयानका क्रममा बोली फेर्ने क्रम बढेपछि बुधबार सप्तरी जिल्ला अदालतले एक जाहेरवालालाई नै कैद सजाय र जरिवाना गरेको छ ।
जिल्ला न्यायाधीश चन्द्रमणि ज्ञवालीको इजलाशले बलात्कार मुद्दामा झुठा उजुरी दिने महिला जाहेरवालालाई एक महिना कैद र एक हजार रुपैयाँ जरिवानाको फैसला गरेको सप्तरी जिल्ला अदालतले जनाएको छ ।
जाहेरवालाले आफ्नी १६ वर्षीया छोरीलाई ०७७ भदौ २० गते सप्तरीको खडक नगरपालिका–११ का १८ वर्षीय तेजनारायण साहले बलात्कार गरेको भन्दै उजुरी दर्ता गराएकी थिइन् । इलाका प्रहरी कार्यालय कञ्चनरूपले पीडितको स्वास्थ्य परीक्षण गर्नुका साथै साहलाई भदौ २१ गते पक्राउ गरी जबरजस्ती करणी मुद्दामा कारवाही थालेको थियो ।
अदालतको आदेश बमोजिम ०७७ असोज १६ गतेदेखि पुर्पक्षका लागि राजविराज कारागारमा थुनामा राखिएका साह भने निर्दोष साबित हुँदै बुधबार नै रिहा भएका छन् ।
साथी अनील साहसँगै खाना खान पीडितको घर गएका परिचित साहले कोठामा कोही नभएको मौका छोपी बलात्कार गरेको पीडितले समेत प्रारम्भिक वयान दिएकी थिइन् । तर अदालतको थुनछेक आदेशबमोजिम आरोपित कारागारमा थुनामा पुगेपछि पीडित र पीडितकी आमा होस्टाइल भएकी छन् । उनीहरुले पछिल्लोपटक आफूहरुले प्रहरीमा उजुरी नदिएको, आफूले सहीछाप नगरेको, आरोपितले बलात्कार नगरेको जस्ता उल्टा वयान दिएका छन् ।
पाँच महिनादेखि चिनजान भई घरकोठामा सँगै बसेको बेला पीडितका परिवारले थाहा पाएर विवाह गर्न दवाव दिएको र नमान्दा प्रहरीमा झुठा उजुरी गरेको आरोपितले सुरुदेखिनै बताउँदै आएका थिए । चिनजानका आधारमा ओभरसियर अध्ययनरत सहलाई खाना खान घर बोलाएर विवाह गर्न दवाव दिएको तथा सो दवाव नमाने पछि प्रहरीमा बलात्कारको झुठा उजुरी गरेको साहका बुवा श्रवण साहले बताए ।
जबर्जस्ती करणीका हकमा उजुरी गर्ने र बकपत्र गर्नेले झुठा विवरण दिए वा लेखाएमा कानुनले सजायको व्यवस्था गरेको छ । झुठा जाहेरी दिने र अदालतमा बयानका क्रममा बोली फेर्ने क्रम बढेपछि यस सम्बन्धी कानुन बनेको हो ।
प्रतिक्रिया दिनुहोस !
