क्रसर उद्योगले गाउँ जोखिममा : स्थानीय आन्दोलित, केराबारीमा तनाव

विराटनगर : अव्यवस्थित क्रसर उद्योग सञ्चालन गरेका कारण गाउँनै बाढीको उच्च जोखिममा परेको भन्दै मोरङको केराबारी गाउँपालिका ८ का स्थानीयबासी आन्दोलनमा उत्रिएका छन् । 

गाउँ नजिकै भएर बग्ने खदम खोलामा रहेका दुई क्रसर उद्योगले गाउँ तर्फको भागमा अत्याधिक गहिरो पार्दै गिट्टि, बालुवा उत्खनन् गरेका कारण गाउँ बाढीको उच्च जोखिममा परेको स्थानीयको भनाइ छ ।   

महादेव मिनरल इन्ड्रष्टिज र शिवम् क्रसर उद्योगले अव्यवस्थित रुपमा उत्खनन् गर्दै गाउँ सम्मनै आइपुगेकाले केराबारी गाउँपालिका–८ आमजुङ्गी बस्ती जोखिममा परेपछि शनिबारबाट स्थानीयवासी आन्दोलित बनेका हुन् ।

शनिबार गाउँतर्फको क्रसरको मेसिन हटाउन आन्दोलन गरेका स्थानीयले आइतबार बिहानैदेखि केराकाबरी गाउँपालिका घेराउ गर्दै जनप्रतिनिधि र प्रहरी प्रशासनविरुद्ध नाराबाजी गरिरहेका छन् । 

अहिले पनि स्थानीयले आफूहरुको समस्यामा जनप्रतिनिधि गम्भीर नबनेको भन्दै गाउँपालिका घेराउ गरिरहेका छन् । गाउँपालिकालाई नेपाल प्रहरी र सशस्त्र प्रहरीले सुरक्षा दिएको छ । 

पीडित मध्येका एक स्थानीय जीतबहादुर बस्नेतका अनुसार खदम खोलामा दुई उद्योगले अबैध उत्खनन् निरन्तर गरेको र स्थानीयले गाउँतर्फ खोला नढल्किने गरी उत्खनन् गर्न भन्दा पनि प्रहरी प्रशासन र जनप्रतिनिधिकै मिलेमतोमा उत्खनन् नरोकिएकाले आन्दोलन गर्नुपरेको बताए । 

क्रसर उद्योग सञ्चालक भीम पौडेलले जनप्रतिनिधिदेखि प्रहरी प्रशासन सबैलाई मिलाएकाले  अवैध उत्खनन नरोकिएको स्थानीयको आरोप छ । 

गाउँपालिका अध्यक्ष रोहितकुमार कार्की अहिले आफू गाउँपालिकाको कार्यालय भित्रै रहेको र बाहिर नारा जुलुस लगाएकाले यस विषयमा अहिले केही नबोल्ने बताउँछन् । ‘पहिले वार्ता गरौँ, अनि कुरा गरौँला,’ प्रमुख कार्कीले अन्नपूर्णसँग भने । 

गाउँतर्फको भागमा उत्खनन् गरिएको क्षेत्र । 

गाउँपालिका घेराउ गर्दै स्थानीय । तस्विर : रविन भट्टराई