राजविराज: डाँका र जालसाजी कसुरमा ५६ वर्षदेखि फरार रहेका एक अभियुक्तलाई सप्तरी प्रहरीले पक्राउ गरेको छ ।
डाँका कसुरमा १० वर्ष कैद र जालसाजी कसुरमा छ महिना कैद सजाय ठहर भएका सप्तरीको महादेवा गाउँपालिका–१ पकरीका श्रीलाल यादवलाई प्रहरीले उनकै घरबाट पक्राउ गरेको हो ।
सप्तरी जिल्ला अदालतमा आइतबार पेश भएका यादवलाई कैद भुक्तानीको लागि आइतबार नै राजविराज कारागारमा थुनामा पठाइएको जिल्ला प्रहरी कार्यालय सप्तरीले जानकारी दिएको छ । फरार सूचीमा रहेका यादवलाई प्रहरी चौकी पकरीबाट खटी गएको प्रहरी टोलीले घरमै रहेको अवस्थामा पक्राउ गरेको हो ।
सप्तरी जिल्ला अदालतका अनुसार यादवलाई जालसाज कसुरमा २०२१ जेठ १९ गते ६ महिना कैद र डाँका कसुरमा २०२३ भदौ ३ गते १० बर्ष कैद सजायको फैसला भएको थियो । महादेवा गाउँपालिका–१ पकरीका सुरैतलाल यादवको जाहेरीले ५६ वर्ष अघि नै कैद सजाय ठहर भए पनि यसअघि प्रहरीले फरार अभियुक्त गाउँघरमा नरहेको भन्दै प्रतिवेदन बुझाउँदै आएको थियो ।
फरार सुचीमा रहेका अभियुक्तहरुलाई खोजतलास गरी पक्राउ गर्दै अदालतको फैसला कार्यान्वयन गर्ने अभियान अन्र्तगत यादवलाई पक्राउ गरिएको जिल्ला प्रहरी कार्यालय सप्तरीका प्रहरी नायव उपरिक्षक भुवनेश्वरप्रसाद साहले बताए ।
प्रतिक्रिया दिनुहोस !
