एउटै टोलका १२० जनाको कोरोना परीक्षणमा ८० जनामा संक्रमण पुष्टि

जाजरकोट : केही दिनअघि कोरोना संक्रमणका कारण एक महिलाको ज्यान गएको भेरी नगरपालिका ४ सिर्जना टोलमा गरिएको कोरोना परीक्षणबाट ८० जनामा संक्रमण पुष्टि भएको छ । एक सय पाँचजनाको पीसीआर परीक्षण गर्दा ७३ जनामा संक्रमण देखिएको भेरी नगर स्वास्थ्य शाखा प्रमुख यज्ञनाथ गौतमले बताए । त्यस्तै सोही टोलमा १५ जनाको एन्टिजेन परीक्षण गर्दा सातजनामा कोरोना पोजेटिभ देखिएको उनले बताए । 

सिर्जना टोलमै केही दिनअघि ४५ वर्षीया एक महिलाको कोरोनाका कारण ज्यान गएको थियो । परीक्षण गरिएका अधिकांशमा संक्रमण देखिएपछि स्थानीय त्रसित भएका छन् । वडाध्यक्ष खम्ब जंग शाहले सबैलाई सचेत रहन, स्वास्थ्य मापदण्ड पालना गर्न र घर बाहिर ननिक्लन आग्रह गरेका छन् । ज्यानमारा कोरानालाई सामान्य रुपमा नलिन उनको सबैलाई विशेष अनुरोध छ ।

त्यस्तै वडा नम्बर ३ का एक सय ६२ र वडा नम्बर १ र ४ का एक सय ८२ जनाको पीसीआर रिपोर्ट आउन बाँकी छ । सुर्खेतस्थित प्रयोगशालामा पालो नपाउँदा रिपोर्ट आउन ढिलाइ भएको हो । 

छेडागाडमा २२ जनाको पीसीआर परीक्षण गर्दा २० जनामा कोरोना संक्रमण

जाजरकोटको छेडागाड नगरपालिकामा २२ जनामा कोरोनाको पीसीआर परीक्षण गर्दा २० जनामा संक्रमण देखिएको छ । प्रमुख प्रशासकीय अधिकृत झलक केसी सहित नौजना नगरपालिकाका कर्मचारी र पाँचजना शिक्षकमा कोरोना पोजिटिभ भएको हो । उनीहरु सबैको होम आइसोलेसनमा उपचार भइरहेको र आफ्नो अवस्था सामान्य रहेको प्रमुख प्रशासकीय अधिकृत केसीले बताए । 

हाल जिल्लामा संकास्पदलाई मात्र परीक्षण गर्ने गरिएको छ । जिल्लामा सक्रिय संक्रमितको संख्या सोमबारसम्म तीन सय नाघेको छ । जिल्लाभर तीन सय ८० जना सक्रिय संक्रमित रहेको स्वास्थ्य सेवा कार्यालय जाजरकोटले जनाएको छ । 

कार्यालयका महामारी पोकल ब्यक्ति कृष्णबहादुर खत्रीका अनुसार ५७ जनाले कोरोना जितेका छन् । १४ जना जिल्ला अस्पतालको आइसोलेशनमा छन् । ८ जनालाई जिल्ला बाहिर रिर्फर गरिएको छ । एक जनाको मृत्यु भएको छ । संक्रमण भित्र भित्रै जिल्ला भर फैलिएको भएपनि परिक्षणको दायरा नबढाइएको स्थानीयको गुनासो छ । 

स्थानीय प्रशासनले लकडाउन गरेपनि गाँउघरमा मानिसहरुको आवागमन रोकिएको छैन । खासमा लकडाउनको बेला सक्रिय संक्रमित पहिचान गर्ने, संक्रमितलाई अलग गराउने, कन्ट्रयाक ट्रेसिङ् गर्ने र परीक्षणको दायरा बढाउनुपर्ने हो तर झारा टार्ने बाहेक गम्भीर रुपमा परीक्षणलाई तीव्रता दिन नसकेको पत्रकार महासंघका जिल्ला अध्यक्ष बालकुमार शर्माले बताए । 

‘कोरोना नियन्त्रण र रोकथाममा सम्बन्धित निकाय गम्भीर देखिएनन् । यस्तो तालले जति लकडाउन गरेपनि संक्रमण फैलने दर रोकिदैन,’ उनले भने ।