कोरोना नियन्त्रण गर्न गाउँगाउँमा चिकित्सकीय सेवा
दाङ: समुदायमा कोरोनाको संक्रमण उच्च देखिएपछि दाङमा चिकित्सक र स्वास्थयकर्मी सहित गाउँ–गाउँमा स्वास्थ्य घुम्ती सेवा दिन थालिएको छ । कोरोनाबाट आम नागरिकलाई सुरक्षित गर्न, कोरोना रोकथाम, नियन्त्रण र उपचारको परामर्श दिन चिकित्सकीय घुम्ती सेवा दिन थालिएको हो ।
कोरोनाको त्रास र समुदायको लाजका कारण संक्रमणलाई लुकाएर राखेका व्यक्ति र परिवारलाई घुम्ती शिविरमा खटिएका स्वास्थकर्मीले मनोपरामर्श दिन र स्वास्थ्य परीक्षण गरी प्रारम्भिक उपचारका साथै अवस्था अनुसार अस्पतालसम्म पुर्याउन सहयोग र परामर्श गर्नेछन् ।
यसले समुदाय स्तरमा राम्रो भएको स्थानीयहरुको भनाइ छ । ब्याकवार्ड एजुकेशन सोसाइटी बेस नेपालको समन्वय र सहयोगमा डा राजीव झाको नेतृत्वमा ६ सदस्यीय स्वास्थकर्मीको टोली गाउँ–गाउँमा पुग्न थालेको छ । गत बिहीवारदेखि यस अभियान सुरु गरिएको र प्रभावकारी हुँदैगएको बेसका कार्यकारी निर्देशक चुर्णबहादुर चौधरीले जानकारी दिए ।
पूर्वराज्यमन्त्री एवम लुम्बिनी प्रदेशसभा सदस्य डिल्ली बहादुर चौधरीले आरम्भ गरेको अभियान अहिले तिव्र रुपमा बस्ती बस्तीमा पुगेको छ । चौधरीले स्थानीय सरकारलाई यो अवस्थामा हरेक क्षेत्रबाट सहयोगको खाँचो भएको, स्थानीय सरकारसँग समन्वयमा घुम्ती स्वास्थ शिविर गाउँमा खटिएको बताए । उनले यस्ता प्रयासहरुले गाउँमा भएको समस्या समाधान हुने र कोरोनालाई नियन्त्रण गर्न सहयोग पुग्ने विश्वास गरे ।
स्वास्थकर्मी टोलीको नेतृत्व गरेका डा राजीव झाले गाउँ बस्तीमा कोरोना पीडित व्यक्तिले पीसीआर टेस्ट नगराउने र संक्रमण लुकाएर राख्दा झनै संक्रमणको भयावह स्थिति आएको बताए । ‘ज्वोरो नाप्ने थर्मल गन, अक्सिजनको मात्रा चेक गर्ने अक्सो मिटरकप प्रयोग गर्ने र अवस्थाको विश्लेषण गरी आवस्यक औषधि निशुल्क रुपमा उपलब्ध गराइने डा झाले बताए ।
कोरोना संक्रमितको लक्षण देखिएका र आशंका लागेकालाई पीसीआर परीक्षणका लागि परामर्श दिइने तथा सामान्य अवस्थाकालाई आवश्यक औषधि दिएर नियमित निगरानी गरिने उनले बताए ।
तुलसीपुर नगर स्तरीय मनोपरामर्श समूहका संयोजक सुशील बस्नेतले उपचार सँगसँगै परामर्श अनिवार्य भएको हुँदा परामर्श पनि सँगै लैजानु पर्ने बताए । उनले नगरले परामर्शको अभियान नै सञ्चालन गरेको र गाउँस्तरमा त्यो बढी प्रभावकारी रहेको बताए ।
घुम्ती शिविरबाट पहिचान गरिएका बिरामीलाई एम्बुलेन्सबाट निशुल्क उद्दार गरी सम्बन्धित अस्पताल सम्म पुर्याउने व्यवस्था गरिएको कार्यकारी निर्देशक चौधरीले बताए ।