बूढीगण्डकीको बाढीले ठाउँ ठाउँमा घर बगायो, कयौं बस्ती उच्च जोखिममा
असार ७, २०७८ सोमबार १४:१०:०
गोरखा : अबिरल वर्षापछि बूढीगण्डकीमा आएको बाढीले धार्चे गाउँपालिकाको यारु बगरको बस्ती जोखिममा परेको छ । यारुको रेस्टुरेन्ट, टिहाउस रहेको तल्लो टोला १५ वटा घर टहरा उच्च जोखिममा रहेको धार्चे गाउँपालिका १ का वडाअध्यक्ष दिलिप गुरुङले जानकारी दिए । त्यहाँका बासिन्दा दिउँसो त्यहीँ बस्ने र राति माथिल्लो टोलको घरमा सुत्ने गरेका अध्यक्ष गुरुङले जानकारी दिए ।
त्यस्तै स्याउली भट्टीको १६ वटा टहराबाट पनि मान्छे विस्थापित भएका छन् । बाढीले निरन्तर हानेर जमिन धराप बनाएपछि त्यहाँका बासिन्दा अन्यत्र सरेर बसेका गुरुङले जानकारी दिए ।
‘ठूलो ढुंगाको दुईवटा घरमध्ये राजकुमार ढकालको घर बगायो ।कान्छा घलेको घर जोखिममा छ । व्याङ्लाकुनाको धनप्रसाद घलेको घर पनि लग्यो’, वडाअध्यक्ष गुरुङ भन्छन्, ‘हुल्चुकमा कान्छा गुरुङको घर पहिरिएको छ ।
बुप्चेतका चन्द्रबहादुर र अर्का छिमेकीको दुई घर जोखिममा छन् । गण्डकीले पहाडको फेदबाट जग खोतल्दै आएकाल समस्या बनाएको उनले बताए । तातोपानीबाट दोभान जाने बाटो क्षतिग्रस्त बनाएको छ । तातोपानीको पुल तरेर पारि जान नसक्ने भएपछि गाउँलेहरु नेपाली सेनाले बिस्फोट गरेर खोल्दै गरेको बाटो हुँदै दोभान निस्कने गरेको धार्चे गाउँपालिका १ का वडाअध्यक्ष दिलिप गुरुङले जानकारी दिए ।
छेकम्पारको छुलेगाउँ उच्च जोखिममा
बर्षेनि पहिराले कटान गर्ने गरेको तिब्बत सीमानाको छुले गाउँ बाढी र पहिरोको जोखिममा रहेको छ । दुवैतिरबाट दुई ठूला खोलाको कटानले गाउँ जोखिममा रहेको चुमनुब्री गाउँपालिका ७ का वडाअध्यक्ष पासाङफुञ्जो लामा बताउँछन् ।
बर्षेनि स्यार(बूढीगण्डकी) र छुलेखोलाले वारि, पारिका दुवै टोलमा क्षति पुर्याउने गरेको वडाअध्यक्ष लामाले जानकारी दिए । दुई टोलमा गरी छुलेमा करिब ४५ घरधुरी छन् । ‘यस वर्ष पनि छुलेको दुईवटा टोल जोड्ने फड्के बगाएको छ’, उनले भने, ‘पोहोर पनि बगाएर पुननिर्माण गरेको हो । यसवर्ष फेरि बगाएको छ । छुलेबाट निले जाने बाटो पनि लग्यो ।’
पुल लगेपछि याक, चौरी, घोँडाहरु डोरीले बाँधेर खोलामा धकेल्ने र पारिबाट तानेर निकाल्ने गर्नुपरेको उनले बताए । ‘मान्छे चाहिँ एउटा मुढा तेस्र्याएर जबर्जस्ती तरिरहेका छन्’, उनले भने, ‘छुले र नीले बीचको गोमेगुम्बाको आँगन पनि स्यार खोलाको पहिरोले लगेको छ । छुलेको तीनवटा घरको छेउबाट धेरै पहिरो गएको छ ।’ म्हुगुम्बा तलको छुना पुल पनि पहिरो लगेको छ । चिपु गुम्बाको भान्सा घर पनि लगेको उनले बताए । बुर्जीगाउँको छिरिङ घ्युर्मेको घर पनि पहिरोले तानेको उनले बताए ।
प्रतिक्रिया दिनुहोस !
