बुटवल : लुम्बिनी प्रदेशका मुख्यमन्त्रीमा माओवादी केन्द्र संसदीय दलका नेता कुलप्रसाद केसीले दावी गरेका छन् । प्रदेश प्रमुख अमिक शेरचनले बुधबार संविधानको धारा १६८ को उपधारा २ बमोजिम बहुमतको मुख्यमन्त्रीका लागि आह्वान गरेका थिए ।
मुख्यमन्त्री शंकर पोखरेलले राजिनामा दिएपछि नयाँ मुख्यमन्त्री चयनको प्रक्रिया थालिएको हो । केसीले ४२ जना सांसदको हस्ताक्षर बुझाएका छन् । सूर्य चिन्हबाट चुनाव जितेको स्वतन्त्र समूहका अजय शाही समेत केसीको पक्षमा देखिएका छन् ।
मुख्यमन्त्री दाविका लागि बिहीबार तीन बजेसम्मको समय तोकिएको थियो । निर्धारित समयमा एकजना मात्रैको दावी परेपछि केसीलाई आज नै मुख्यमन्त्री चयन गरिने भएको छ ।
आजै शपथ ग्रहण गरी सानो आकारको मन्त्रीमण्डल बनाउने तयारी छ। सरकारमा जाने मन्त्रीको आकांक्षी धेरै भएकाले नेताहरुलाई हम्मेहम्मे छ । जसपाका तीन जना मन्त्री बन्दैछन् । माओवादी, कांग्रेसले भने मन्त्री छनौट गरिसकेका छैनन् ।
एक/एक जना मन्त्रीसहित केसीले शपथ ग्रहण गर्ने बताइएको छ । जसपाका तीनमन्त्रीमध्ये दुई महिलालाई विनाविभागीय बनाइने छ । जसपाका अहिले तीनजना मात्रै सांसद छन् । तीनैजना मन्त्री हुन लागेका हुन् ।
दलका नेता सहसराम यादव, पुर्मती ढेगा र सुमन शर्मा रायमाझी मन्त्री हुनेछन् । रायमाझी यसअघि भौतिक पूर्वाधार राज्यमन्त्री बनेर राजिनामा दिएकी थिइन् ।
प्रतिक्रिया दिनुहोस !
