बुटवल : लुम्बिनी प्रदेशमा मन्त्रीको शपथ रोकिएको छ । शुक्रबार चार बजे सरकार विस्तार गर्ने तयारी भइरहँदा गठबन्धनका दलमा मन्त्री बन्ने व्यक्तिको नाम टुंगो नलागेपछि रोकिएको हो । मन्त्री बन्ने टुंगो लागेका सांसदहरुलाई मुख्यमन्त्री कार्यालयले शपथका लागि निम्ता समेत दिएको थियो । कांग्रेसभित्र कुरा नमिलेपछि शपथ दुई दिनपछि हुने बताइएको छ ।
सरकारका प्रवक्ता कृष्णध्वज खड्काले छलफल नटु्गिएकाले शपथ रोकिएको बताए । उनले केही दिनभित्रै मन्त्रिपरिषद् विस्तार हुने बताए । सरकारमा जानका लागि माओवादीले मन्त्री टुंग्याएको छ । कांग्रेसका केही मन्त्रीको समेत नामको टुंगो लागेको छ। एक मन्त्री र एक राज्यमन्त्रीमा कुरा मिलेको छैन । सरकारमा माओवादीबाट दाङका इन्द्रजित थारु र बर्दियाका तिलकराम शर्मा मन्त्री टुंगो लागेको छ । नेकपा (एकीकृत समाजवादी) बाट रमा घर्ती मन्त्री बन्ने छिन् । उनले स्वास्थ्य मन्त्रालयमा पाउने चर्चा छ ।
माओवादीले दाङकी बिमला खत्री वलीलाई राज्यमन्त्री बनाउने भएको छ । उनलाई एमालेले आफ्नो सांसद दावि गर्दै कारबाहीको आग्रह गरेको छ । पछिल्लो समय उनले माओवादी केन्द्र रोजेकी छन् । कांग्रेसले चारमन्त्री र एक राज्यमन्त्री पाउने टुंगो लागेको छ । कांग्रेसले यसअघि नै पर्यटन, ग्रामिण तथा सहरी विकास मन्त्रीमा दाङका डिल्लीबहादुर चौधरीलाई पठाएको छ ।
वन, वातावरण तथा भूसंरक्षण मन्त्रीमा बर्दियाका सुरेन्द्र हमाल र शिक्षा विज्ञान युवा तथा खेलकुद मन्त्रीमा रूपन्देहीका बसिउद्धिन खाँलाई पठाउने निर्णय भएको कांग्रेसका प्रमुख सचेतक फखरुद्दिन खानले बताए । ऊर्जा, जलस्रोत तथा सिँचाई मन्त्रीमा रूपन्देहीका अष्ठभुजा पाठक र पाल्पाका वीरबहादुर रानामध्ये कसलाई पठाउने भन्नेबारे टुंगो लाग्न बाँकी छ । यस्तै कांग्रेस भागमा परेको राज्यमन्त्रीको नाम पनि टुंगो लागेको छैन ।
प्रदेशमा टुंगो लगाउन नसकेपछि कांग्रेस केन्द्रले नै मन्त्रीको टुंगो लगाएको हो । लुम्बिनीमा मुख्यमन्त्री कुलप्रसाद केसीले शपथ लिएको असोज २८ गते दुई महिना पुग्दैछ ।
प्रतिक्रिया दिनुहोस !
