बेँसीसहर : नेकपा(एकीकृत समाजवादी)का अध्यक्ष माधवकुमार नेपालले पाँच दलिय सत्ता गठबन्धन आगामी निर्वाचनसम्म कायम रहने बताएका छन् । शनिबार लमजुङको बेँसी सहरमा आयोजित अगुवा कार्यकर्ता भेलालाई सम्बोधन गर्दै अध्यक्ष नेपालले गठबन्धन चुनावसम्म कायम रहने भएपछि एमालेहरुको सातोपुत्लो गएको आरोप लगाएका छन् ।
‘अस्ति नेकपा (माओवादी केन्द्र)को अधिवेशनमा प्रधानमन्त्री शेरबहादुर देउवाले गठबन्धन चुनावसम्म रहने बताएपछि बैरीहरुको सातोपुत्लो गएको छ’, नेपालले भने, ‘विचराहरु अहिले रुदैँकराउँदै हिँडेका छन् । भुक्दै, गालीगर्दै हिँडेका छन् । उनीहरुलाई हिँड्न दिनुहोस् । कुकुर भुक्दै गर्छ, हात्ती लम्किदै गर्छ । हामी असल काम गरेर जनताको पक्षमा उभिएर अघि बढ्न प्रण गरौं’, उनले भने ।
नेकपाहुँदा केपी ओली तानाशाह बन्दै गएपछि प्रधानमन्त्रीको कुर्सीबाट सडकमा पछार्न परेको उनले बताए । ओलीलाई सत्ताको मात लागेर अंहकारी, घमण्डी र तानाशाही बन्न पुगेको आरोप लगाएका छन् । ‘तानाशाही बुद्धी बोक्नेहरुसँग पैठेजोरी खेल्यौं, चुनौती दियौं, संविधान मिच्नेलाई चुनौती दियौं, कुर्चीबाट तल झार्यौं’, उनले भने ।
उनले अब एमाले पार्टी पुरानो भएको र यसको भविष्य नरहेको बताए । अध्यक्ष नेपालले एमालेमा 'बा' भन्ने बाहेक अरुको स्थान नरहेको भन्दै त्यहाँ भित्र कमरेड भन्न नपाइने र 'बा' भनेर पूजा गर्दै खुट्टा छुनुपर्ने अवस्था रहेको बताए ।
आफ्नो पार्टीको तागत बढ्दै गएपछि एमालेहरुमा ढुकढुकी बढेर काँप्न थालेको उनले बताए । डरले उनीहरु आफुूहरुलाई गाली गर्न थालेको उनको भनाई थियो । उनले एमाले नेताहरुलाई प्रश्नगर्दै कस्ता कस्ता मान्छेलाई तह लगाएकाले तिमीहरु कुन मूल्यका मान्छे हौ र भनेर प्रश्न गरे ।
नेकपा एकीकृत समाजवादीका नेता एवं श्रम रोजगार तथा सामाजिक सुरक्षा मन्त्री किशान श्रेष्ठले गण्डकीमा नेकपा एमालेको पत्तासाफ गर्ने चुनौती दिए । उनले आफ्नो पार्टी मजबुत बन्दै गएको दाबी गरे ।
कार्यक्रममा नेकपा एसका उपाध्यक्ष एवं गण्डकी प्रदेश इन्चार्ज केशवलाल श्रेष्ठ, स्थायी कमिटि सदस्य एवं पूर्वमन्त्री उर्वादत्त पन्त लगायतले बोलेका थिए । अगुवा कार्यकर्ता प्रशिक्षण् अघि कार्यकर्ताहरुले बेँसी सहरमा शक्ति प्रर्दशन गरेको जिल्ला अध्यक्ष रामबावु अधिकारीले बताए ।
प्रतिक्रिया दिनुहोस !
