विविध कार्यक्रममा सहभागी हुन प्रचण्ड महोत्तरी आउँदै
![विविध कार्यक्रममा सहभागी हुन प्रचण्ड महोत्तरी आउँदै](https://annapurnapost.prixacdn.net/media/albums/prachanda-14_20220331115143_cqNaBA3iAP.jpg)
महोत्तरी : नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल प्रचण्ड महोत्तरीको गौशाला आउने भएका छन्। आइतबार दिउँसो १ बजेको समयमा नगरकार्यापालिकाको प्रशासनिक भवनको उद्घाटन गर्नका लागि अध्यक्ष प्रचण्ड गौशाला आउने कार्यक्रम रहेको छ ।
करोडौंको लागतमा नवनिर्मित भवनको उद्घाटनको पूर्वनिर्धारित कार्यक्रम अनुरुप हरेक तयारी पूरा भएको मेयर शिवनाथ महतोले बताए । त्यस्तै अध्यक्ष प्रचण्डसँगै संघीय सरकारका भूमि व्यवस्था, सहकारी तथा गरिवी निवारणमन्त्री शशि श्रेष्ठ, पूर्वमन्त्री गिरीराजमणि पोखरेल लगायतका नेता कार्यकर्ताहरु सहभागी हुने मेयर महतोले जानकारी दिए ।
नापी र मालपोत कार्यालयको उद्घाटन
गौशालावासीको वहुप्रतिक्षित नापी तथा मालपोत कार्यालयको पनि आजै उद्घाटन हुने भएको छ । आइतबार दिउँसोको समयमा भूमि, व्यवस्था, सहकारी तथा गरिबी निवारणमन्त्री शशि श्रेष्ठले कार्यालयको उद्घाटन गर्ने कार्यक्रम रहेको गौशाला नगरपालिका स्रोतले जनाएको छ ।
त्यस्तै अध्यक्ष प्रचण्ड महोत्तरी आएलगतै बिहान १० बजे बर्दिवासको विभिन्न कार्यक्रममा सहभागी हुने भएका छन् । बर्दिवास नगरपालिका ११ खयरमारामा शहिद स्मृति पार्क शिलान्यास गर्नुको साथै बहुप्राविधिक शिक्षालयको नवनिर्मित भवनको उद्घाटनसमेत आजै गर्ने कार्यक्रम रहेको नेकपा माओवादी महोत्तरीले जनाएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)