इलाम : लाखौं रुपैयाँको कारोबार हुने पशुपतिनगर नाका दसैंको समयमा पनि सुनसान छ ।
पहिलेपहिले एक महिनादेखि भारतीय ग्राहकले भरिने पशुपतिनगरमा यसपटक सुनसान बनेको हो ।
यो भीडभाड हुने सिजन हो तर सुनसान छ स्थानीय व्यापारी जीआर खड्काले बताए । दसैंको समयमा राति नौ बजेसम्म भीडभाड हुने बजारमा दिनभरीमा पनि बोहोनी नहुने गरेको बताए ।
विगतका दसैंमा दार्जीलिङबाट दैनिक आउने सयौं भारतीय पर्यटकहरु पशुपतिनगर आएर कपडा, जुत्ता कस्मेटिक सामाग्री खरिद गर्ने र यसबाट लाखौंको कारोबार हुने गरेको सूर्योदय नगर उद्योग वाणिज्य संघका अध्यक्ष प्रमोद राईले बताए । उनले भने, 'हाम्रो लागि दसैंका सबैभन्दा खराब सिजन बन्यो यो वर्ष ।'
भारतको पश्चिम बंगाल, सिक्किम र भुटानसम्मका व्यापारीहरुको कारोबार हुने पशुपतिगनर बजारमा भारततर्फको भन्सारले आयात निर्यातको कारोबार नगर्दा व्यापरिको कारोबार पनि ठप्प छ । भारतीय पक्षले भन्सारको कारोबार नगर्दा नेपालका उत्पादन वैधानिक रुपमा भारततर्फ निकासी हुन सकेको छैन ।
सूर्योदय उद्योग वाणिज्य संघका अध्यक्ष प्रमोद राईले भने, 'गत वर्ष यो अवधीमा दैनिक ५० लाखको कारोबार हुने व्यपारीक केन्द्रमा अहिले मुस्किलले १० लाखसम्मको कारोबार हुने गरेको छ ।’
२०३६ सालमा स्थापना भएको पशुपतिनगर बजारमा ९० प्रतिशत ग्राहक भारतीय पर्यटक, व्यपारी र सर्वसाधारण हुने गरेका थिए ।
चीनबाट सोझै सामान भारतका विभिन्न सहरमा जाने गरेकाले पनि पशुपतिनगरको व्यापार घट्न थालेको संघका अध्यक्ष प्रमोद राईले बताए । उनले चीनले नुथला बोर्डर हुँदै भारततर्फ आफ्ना उत्पादन हुँदै निर्यात गर्न थालेपछि पशुपतिनगर बजार थलिन थालेको हो ।
पशुपतिनगरमा व्यपार गर्ने ७ सय व्यपारीहरुमध्ये अहिले ३५० हाराहारीमा मात्र व्यापारीहरु पशुपतिनगरमा छन् । व्यापार सुक्दै जाँदा अधिकांश व्यापारीहरु विस्थापित भइ भारतको सिलिगुडी, काठमाडौं, विराटनगर, विर्तामोड लगायतका सहरमा जाने गरेका छन् ।
इलाम, पाँचथर र ताप्लेजुङ क्षेत्रमा उत्पादित सामग्री निर्यात गर्न सहज र छोटो बाटो हुने पशुपतिनगर नाकामा भारततर्फ अध्यागमन, प्लान्ट क्वाराइन्टेन खोल्न पहल गर्न सरकारलाई आग्रह गरेपनि सुनुवाइ नभएको अध्यक्ष राईले बताए ।
प्रतिक्रिया दिनुहोस !
