तनहुँमा निर्वाचन बिथोल्ने तयारीमा रहेको गिरोह प्रहरी नियन्त्रणमा
![तनहुँमा निर्वाचन बिथोल्ने तयारीमा रहेको गिरोह प्रहरी नियन्त्रणमा](https://annapurnapost.prixacdn.net/media/albums/arrested_20180911053149_uVBopGodUm.jpg)
तनहुँ : निर्वाचनको मिति नजिकिदै गर्दा विभिन्न गिरोहहरु सल्बलाउन थालेका छन् ।
निर्वाचन बिथोल्ने गरी मतदाताहरुमा त्रास फैलाउने र विभिन्न भ्रम छर्ने उद्देश्यले गिहरोहरु सक्रिय हुन थालेको पाइएको हो। गत कार्तिक १३ गते तनहुँको बन्दिपुर गाउँपालिका १ बाट निर्वाचन बिल्ने गरी योजना बनाइरहेको अबस्थामा प्रहरीले पाँचजनाको समूहलाई पक्राउ गरेको छ ।
पक्राउ पर्नेहरुमा अमृत सापकोटा (गौरव), भवनबहादुर उपरकोटी (सागर), गमबहादुर पौडेल, विजयराज पौडेल र उपबहादुर थापा मगर रहेको जिल्ला प्रहरी कार्यालय तनहुँका प्रहरी नायब उपरीक्षक युवराज खड्काले जानकारी दिए ।
प्रहरीका अनुसार उनीहरुको साथबाट साढे दुई किलो बारुद्ध र निर्वाचन विरुद्धका पर्चाहरु बरामद गरिएको छ ।
पर्चामा नेपाल कम्युनिष्ट पार्टी (माओवादी) लेखिएको प्रहरीले जनाएको छ । फेला परेका पर्चामा निर्वाचन बहिष्कार गरौं, बक्स बमहरु राखौं, उम्मेदवारलाई गाउँ छिर्न नदिउलगायतका निर्वाचन विरुद्धका नाराहरु उल्लेख गरेको प्रहरी नायब उपरीक्षक खड्काले बताए ।
उनका अनुसार पक्राउ परेका गौरव पार्टीको गण्डकी प्रदेश संयोजक र सागर प्रदेश ब्युरो इन्चार्ज रहेको खुलेको छ । ‘यो घट्नापछि निर्वाचन लक्षित अन्य गतिविधि पनि हुनसक्ने भएकाले निगरानी बढाइएको छ,' उनले भने ‘हामीले थप अनुसन्धान गरिरहेका छौँ ।'
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)