स्वतन्त्र उम्मेदवार कृष्णको दावी: गठबन्धनका रामकृष्ण र एमालेका रघुवीरलाई जित्छु

जनकपुरधाम: देशभर चुनावी सरगर्मी बढेको छ। राजनीतिक दलबाट प्रतिनिधित्व गर्ने दलगत उम्मेदवार र स्वतन्त्र उम्मेदवार आफ्नो एजेण्डासहित चुनावी मैदानमा उत्रिएका छन् । 

धनुषा-४ का उम्मेदवार पनि चुनावी मैदानमा उत्रिएका छन् । यो क्षेत्रमा गठबन्धनका उम्मेदवार नेपाली कांग्रेसका सहमहामन्त्री रामकृष्ण यादव, नेकपा एमालेका सचिव रघुवीर महासेठ, समाजवादी पार्टीका महाजन यादवसहितका उम्मेदवार प्रतिस्पर्धामा छन् । 

चर्चा कमाएका राजनीतिक दलका उम्मेदवार भए पनि जनताको अपेक्षा अनुसार काम नभएकाले अहिले स्वतन्त्रबाट उम्मेदवारी दिएको दावी गर्छन कृष्ण महतो । उनी कलाकार हुन् । गरिबी, अभाव र जनताको पीडा बुझेको प्रतिनिधि बन्ने प्रयासमा रहेको भन्दै उनले अब जनताको साथले विजयी बन्ने दावी गरेका छन् । 

जनतासँग घरदैलो अभियानमा जुटेका उनले आफूले सत्तागठबन्धन र अन्य राजनीतिक दलबाट उठेका उम्मेदवारलाई जित्ने बताएका छन् । 

नाटक तथा विभिन्न टेलिभिजनका कार्यक्रममा अभियान गरेका कृष्ण दलगत उम्मेदवारको विकल्प हुने सरोजकुमार महतो बताउँछन् । धनुषाको बटेश्वरका विजय सिंहले फरक चुनावी शैलीले कृष्णलाई विकल्प बुझ्न सकिने बताए ।