कञ्चनपुर-२ मा हारको बदला लिने साउदको दाउ, विरासत जोगाउने संघर्षमा धामी

काठमाडौं: आगामी मंसिर ४ को प्रतिनिधि सभा निर्वाचनमा कञ्चनपुर-२ मा सत्ता गठबन्धन र एमालेबीच मुख्य प्रतिस्पर्धा हुने देखिएको छ ।

कांग्रेसका नारायणप्रकाश(एनपी) साउद र एमालेका नरबहादुर धामीबीच प्रतिस्पर्धा हुने देखिएको छ । यो निर्वाचन क्षेत्रमा १० जनाको उम्मेदवारी परेको छ । यो क्षेत्रमा स्वतन्त्र उम्मेदवार छैनन् ।

२०७४ सालको निर्वाचनमा ८९ हजार ७९१ मतदाता रहेको यो क्षेत्रमा यस पटक एक लाख ५ हजार ५७७  मतदाता छन् । यो पटक गत निर्वाचनको तुलनामा १५ हजार ७८६ मतदाता थपिएका छन् । महिला मतदाता ५४ हजार ७४६ र पुरुष मतदाता ५० हजार ८३० छन् । थपिएका मतदातामध्ये अधिकांश २१ देखि ४५ वर्ष समूहका छन् ।

निर्वाचनमा प्रतिस्पर्धा गर्ने कांग्रेसका साउद, एमालेका धामीसहित राप्रपाका ३७ वर्षीय अशोकबहादुर सिंह, लोसपाका ३६ वर्षीय लोकराज भट्ट, जनमत पार्टीका ६० वर्षीय प्रेमसिंह बडाललगायतको प्रतिस्पर्धा हुनेछ ।

२०७४ सालको निर्वाचनमा एमालेका धामी ३३ हजार २२० मत ल्याइ विजयी भएका थिए । उनका निकटम प्रतिद्वन्दी कांग्रेसका एनपी साउदले २४ हजार ८९३ मत ल्याएका थिए । धामी र साउदको मतान्तर ८ हजार ३३७ थियो ।  देशभक्त जनगणतान्त्रिक मोर्चा नेपालका चन्द्रबहादुर डगौरा ४५९ मत प्राप्त गरी तेस्रो भएका थिए ।

साउद र धामी विद्यार्थी पृष्ठभूमिबाट राजनीतिमा प्रवेश गरेका हुन् । नेपाली कांग्रेसका केन्द्रीय सदस्य एवम् पूर्वमन्त्री साउदको केन्द्रीय राजनीतिमा बलियो पकड छ ।  साउद प्रधानमन्त्री शेरबहादुर देउवाका विश्वासपात्रका रुपमा चिनिन्छन् । साउद ०७४ को हारको बदला लिँदै संसद पुग्ने प्रयासमा छन् । उनी पहिलो पटक ०५१ को चुनावमा साविक क्षेत्र नम्बर ३ मा एमालेका उर्वादत्त पन्तसँग पराजित भएका थिए ।

 ०५६ मा साविक क्षेत्र नम्बर १ मा उठेका साउदले एमालेका रामकुमार ज्ञवालीलाई पराजित गर्दै सांसद बनेका थिए । ०६४ मा साउद क्षेत्र २ मा माओवादीका नेता देवीलाल चौधरीसँग पराजित भए  । ०७० को दोस्रो संविधानसभा निर्वाचनमा कञ्चनपुरका तत्कालीन चार वटै क्षेत्र कांग्रेसले जितेको थियो ।

धामी एमाले भातृ संगठन अनेरास्ववियुका केन्द्रीय कोषाध्यक्ष रहिसकेका नेता हुन् । विद्यार्थी राजनीतिका समयमा कञ्चनपुरमा छवि बनाएका नेता धामी चर्चित जनज्योती गोलीकाण्डमा घाइते भएका थिए । कञ्चनपुरस्थित सिद्धनाथ बहुमुखी क्याम्पसको सभापति भएका थिए । धामी केपी ओलीका विश्वासपात्रका रुपमा चिनिन्छन् । धामी कञ्चनपुरमा तेस्रो पटक संसदीय चुनाव लड्दैछन् । 

अहिलेसम्मका दुई चुनावमध्ये धामीले एकपटक  जित निकालेका छन् । पहिलो पटक ०७० मा संसदीय चुनाव फेस गरेका धामी तत्कालीन क्षेत्र नम्बर ३ मा कांग्रेसका बहादुरसिंह थापासँग पराजित भएका थिए ।  धामी ०७४ को विरासत कायम राख्दै फेरि संसद पस्ने दाउमा छन् ।

यस्तो छ तथ्याङक
यो निर्वाचन क्षेत्रमा बेदकोट नगरपालिका(८ बाहेक), कृष्णपुर नगरपालिका र शुक्लाफाँटा नगरपालिकाका सबै वडा पर्छन् ।

गत स्थानीय तहको निर्वाचनमा वडाध्यक्षले प्राप्त गरेको मत आँकलन गर्दा पहिलो दल कांग्रेस देखिन्छ । कांग्रेसले २२ हजार ७१४ मत प्राप्त गर्दा एमालेले १८ हजार ३६५ मत प्राप्त गरेको थियो । यस्तै माओवादी केन्द्रले ११ हजार ९३६, नेकपा एकीकृत समाजवादीले ४ हजार ६२५, राप्रपाले ४ हजार १५७ मत ल्याएको थियो । 

यो निर्वाचन क्षेत्रमा कांग्रेस, माओवादी केन्द्र र नेकपा एकीकृत समाजवादीको मत जोड्दा ३९ हजार दुई सय ७५ हुन आउँछ ।

गत स्थानीय तहको निर्वाचनमा यो निर्वाचन क्षेत्रमा कृष्णपुर नगरपालीकाको मेयरमा १० हजार ३३४ मत ल्याउँदै कांग्रेसका हेमराज ओझा विजयी भएका थिए । उनका प्रतिद्वन्दी माओवादी केन्द्रका जोगराज चौधरीले ८ हजार २०० मत ल्याएका थिए ।

यस्तै, बेदकोट नगरपालिकाको मेयरमा कांग्रेसका भोजराज बोहरा ८ हजार ७८ मत ल्याउँदै विजयी भएका थिए । उनका प्रतिद्वन्दी एमालेकी सुशीला सिंहले ४ हजार ७४० मत ल्याएकी थिइन् ।

यस्तै, शुक्लाफाँटा नगरपालिकाको मेयरमा एमाले विजयी भएको थियो । यो नगरपालिकामा कांग्रेसका रणबहादुर महराले ६ हजार ७७३ मत ल्याएर विजयी भएका थिए । उनका प्रतिद्वन्दी कांग्रेसका चिन्तामणि भट्टले ६ हजार २६४ मत ल्याएका थिए ।

स्थानीय तहको निर्वाचनमा वडाध्यक्षले प्राप्त गरेको मत आँकलन गर्दा बेदकोटको वडा १, ३,४,५,७, कृष्णपुरको १,५,८, ९ र शुक्लाफाँटाको ४ र ५ नम्बर वडामा कांग्रेस विजयी भएको थियो ।

यस्तै, बेदकोटको वडा २, ९ कृष्णपुरको ७ र शुक्लाफाँटाको १ र २ नम्बर वडामा एमाले विजयी भएको थियो ।

बेदकोटको वडा ६ कृष्णपुरको २,३,४,६ र शुक्लाफाँटाको ३  नम्बर वडामा माओवादी केन्द्र विजयी भएको थियो । बेदकोट ८ मा भने नेकपा एकीकृत समाजवादीले वडाध्यक्ष जितेको छ । 

स्थानीय तहको निर्वाचनलाई हेर्दा सत्ता गठबन्धनका उम्मेदवार साउद अगाडि देखिन्छ । धामी पनि जित्ने दावीसहित चुनावी प्रचारमा रहेकाले विजयी को हुने भन्ने अन्तिम परिणामले देखाउनेछ ।