डडेल्धुरा : डडेल्धुराको अजयमेरु गाउँपालिकाले उत्कृष्ट जनप्रतिनिधि र कर्मचारीलाई पुरस्कृत गरेको छ। गाउँपालिकाले मंगलबार आयोजना गरेको अर्धवार्षिक समीक्षा तथा सार्वजनिक सुनुवाइ कार्यक्रममा आर्थिक वर्ष २०७८-०७९ को कार्य सम्पादनका आधारमा उत्कृष्ट जनप्रतिनिधि, कर्मचारी, शिक्षक, उपभोक्ता समिति, शाखा र वडा कार्यालयलाई पुरस्कार प्रदान गरेको हो।
उत्कृष्ट जनप्रतिनिधिको पुरस्कार वडा नम्बर १ का अध्यक्ष दत्तिसिंह भण्डारीलाई प्रदान गरिएको छ। यस्तै, सर्वोत्कृष्ट कर्मचारी लोकेश बोहरा, उत्कृष्ट कर्मचारी विष्णुराज भट्ट, उत्कृष्ट स्वास्थ्यकर्मी गणेशबहादुर ऐडी, उत्कृष्ट वडा कार्यालय वडा नम्बर ५, उत्कृष्ट स्वास्थ्य संस्था चिपुर स्वास्थ्यचौकी र उत्कृष्ट शाखाको पुरस्कार पशु विकास शाखाले पाएको छ।
यस्तै, सबैभन्दा धेरै राजस्व संकलन गर्ने वडा कार्यालय वडा नम्बर ३, प्रत्येक वडाका एक÷एक उपभोक्ता समितिका दरले ६ वटा उपभोक्ता समिति र एसईईमा उत्कृष्ट नतिजा ल्याउने विद्यार्थी, स्थानीय पाठ्यक्रम निर्माण गर्ने शिक्षकलाई पनि पुरस्कारसहित सम्मान गरिएको थियो। कार्यक्रममा गाउँपालिकाका निमित्त प्रमुख प्रशासकीय अधिकृत लाल सेटीले अजयमेरु गाउँपालिकाले कार्यान्वयन गरेका योजना र सम्पादन गरेका कामको प्रतिवेदन सार्वजनिक गरेका थिए। कार्यक्रमका सहभागीले गाउँपालिका देशभरिमै नमुना र उत्कृष्ट पालिका भइसकेको स्मरण गराउँदै सोहीअनुसार आगामी दिनमा पनि काम गर्न सुझाव दिँदै गाउँपालिकाका सेवाका बारेमा जिज्ञासा राखेका थिए।
प्रतिक्रिया दिनुहोस !
