उपमेयर महिला फुटबलः उपाधिका लागि फुङलिङ र आठराई त्रिवेणी भिड्ने
फागुन २३, २०७९ मंगलबार १९:५६:२८
ताप्लेजुङ : ताप्लेजुङमा जारी उपमेयर कप महिला फुटबलको उपाधिका लागि फुङ्लिङ नगरपालिका र आठराई त्रिवेणी गाउँपालिका भिड्ने भएका छन्।
मंगलबार सम्पन्न सेमिफाइनल चरणको खेलमा मेरिङदेनलाई ट्राईबेकरमा ५-४ गोलअन्तरले पराजित गर्दै फुङलिङ फाइनलमा प्रवेश गरेको हो।
निर्धारित समयमा एक एक को बराबरी भएपछि खेल ट्राईबेकरमा धकेलिएको थियो। यता सिरीजंघालाई ५-१ गोलको नतिजामा पराजित गर्दै आठराई त्रिवेणी फाइनलमा पुग्यो।
फाइनल खेल बुधबार नारी दिवसका अवसरमा सदरमुकामस्थित भानुजन माद्यमिक विद्यालयको खेलमैदानमा हुने आयोजकले जनाएको छ।
प्रतियोगिताको विजेताले नगद १ लाख ११ हजारसहित ३ वर्षे रनिङ कप र प्रमाणपत्र पाउने छ भने उपविजेताले नगद ५५ हजार ५ सय रुपैयाँसहित मेडल र प्रमाण पत्र पाउने छ।
रनिङ कप १ सय तोला चाँदी र आधा तोला सुन जडित हुने आयोजकले जनाएको छ। प्रतियोगितामा विभिन्न सातवटा विधामा उत्कृष्ट हुनेलाई नगद, ट्रफी र मेडल दिइने जनाईएको छ।
महिलालाई समाजमा थप सशक्त बनाउन खेल क्षेत्रमा उनिहरुको सहभागिता वृद्धि गर्ने उद्देश्यले प्रतियोगिता आयोजना गरिएको नगरपालिकाकी उपप्रमुख भीमादेवी ओझाले बताइन्।
प्रतिक्रिया दिनुहोस !
