हेटौडा : स्वतन्त्र विद्यार्थी युनियन (स्ववियु) निर्वाचनअन्तर्गत मकवानपुरका ७ वटा कलेजमा अहिले मतदान जारी रहेको छ । मतदान बिहान ८ बजेबाट सुरू भएको हो। जिल्लाका ८ वटा क्याम्पसमध्ये थाहा नगरपालिकास्थित पालुङ बहुमुखी क्याम्पसमा भने सहमतिबाटै स्ववियुको नयाँ कार्यसमिति चयन भइसकेको छ ।
सो क्याम्पसमा नेकपा माओवादी केन्द्रको विद्यार्थी संगठन अखिल (क्रान्तिकारी) का पुष्कर श्रेष्ठको नेतृत्वमा सबै पदाधिकारी र सदस्यहरू सर्वसम्मत चयन गरिएको हो । बाँकी ७ क्याम्पसमा मतदान भइरहेको हो ।
जिल्लाको मकवानपुर बहुमुखी क्याम्पस, हेटौंडा क्याम्पस, वन विज्ञान अध्ययन संस्थान, जनप्रिय बहुमुखी क्याम्पस, वंशगोपाल बहुमुखी क्याम्पस, निर्मल बहुमुखी क्याम्पस र मनहरी बहुमुखी क्याम्पसमा निर्वाचन प्रक्रियाबाट स्ववियु कार्यसमिति चयन गर्न लागिएको हो ।
निर्वाचनमा नेपाली कांग्रेस निकट नेविसंघ, माओवादी केन्द्र निकट अखिल क्रान्तिकारी र राप्रपा निकट राप्रविसं एउटा प्यानलमा छन् भने नेकपा एमाले निकट अनेरास्ववियु,नेकपा एकीकृत समाजवादी निकट अनेरास्ववियु र विप्लव नेतृत्वको नेकपा निकट अखिल (क्रान्तिकारी) अर्को प्यानलमा छन् ।
मतदान दिउँसो ४ बजेसम्म हुने जनाइएको छ ।
प्रतिक्रिया दिनुहोस !
