दोलखा : सगरमाथाको द्वार तथा नेपालको स्वीजरल्यान्ड नामले चर्चित दोलखाको पर्यटकीय नगरी जिरीमा कृत्रिम ताल बन्ने भएको छ । सुस्ताएको अवस्थामा रहेको जिरीलाई पुरानै लयमा फर्काउनको लागि ताल निर्माण कार्य सुरु होस् भन्ने चाहाना रहेको जिरी नगरपालिकाका मेयर मित्रबहादुर जिरेलले बताए ।
ताल निर्माणका लागि जस्तोसुकै सहयोग गर्न पनि जिरी नगरपालिका तयार रहेको मेयर जिरेलको भनाइ छ । कृतिम तालको डीपीआर तयार गर्न जिरी नगरपालिकाले एक करोड भन्दा बढी खर्च गरेको उनले बताए । जिरीबासीको लामो समय देखिको ताल निर्माणको सपनालाई बाग्मती प्रदेश सरकारले प्रदेश गौरवको आयोजना घोषणा गरी अगाडि बढाएकोमा जिरीवासीको सपना पूरा हुने दिन आउन लागेको आफूलाई विश्वास लागेको उनको भनाइ छ ।
जिरीमा मानव निर्मित कृतिम ताल निर्माण भएमा जिरीको महत्व बढ्ने मात्र नभइ समग्र दोलखाको आर्थिक क्रियाकलापमा वृद्धि हुने जिरी उद्योग वाणिज्य संघका अध्यक्ष बाबुराजा श्रेष्ठले बताए । जग्गाको मुआब्जा निर्धारण गर्दा भने स्थानीयलाई मर्का नपर्ने गरी गर्नुपर्ने उनले बताए ।
यसैगरी जिरी ताल निर्माणका लागि जिरी नगरबासी सहयोग गर्न तयार रहेको तथा ताल निर्माणको काम छिटोभन्दा छिटो सुरू होस् भन्ने स्थानीयको चहना रहेको जिरीका नागरिक अगुवा केन्द्रज्योति खड्काले भने ।
जिरी कृतिम ताल निर्माणको काम सुरुवात गर्नका लागि बागमती प्रदेश सरकारले चालु आर्थिक वर्षमा १५ करोड रुपैयाँ विनियोजन गरेको छ ।
बागमती प्रदेशको गौरवको आयोजना जिरी मानव निर्मित ताल निर्माणका लागि जग्गाको लगत संकलन गर्ने काम अन्तिम चरणमा पुगेको छ । मानव निर्मित ताल निर्माणका लागि आवश्यक जग्गा अधिग्रहणको प्रयोजनका लागि लगत संकलन गर्ने कार्य अन्तिम चरणमा पुगेको हो ।
प्रदेश गौरवको आयोजना जिरी कृतिम तालको निर्माणका लागि करिब सात सय रोपनी जग्गा अधिग्रहण गर्नु पर्नेमा जग्गाको लगत संकलन गर्ने काम अन्तिम चरणमा पुगेको डिभिजन सिंचाई कार्यालय दोलखाका प्रमुख निर्मल दहालले जानकारी दिए ।
जिल्ला नापी कार्यालय तथा मालपोत कार्यालयबाट आयोजनाको क्षेत्र भित्र पर्ने जग्गाको लगत लिइ अध्ययनको काम भइरहेको उनको भनाइ छ । अध्ययन समाप्त भएपछि आवश्यक जग्गा अधिग्रहणको लागि सिफारिस गरिने उनले बताए ।
डिभिजन सिंचाइ कार्यालय दोलखाको अनुसार तालको डीपीआर तयार भइसकेको छ । कृत्रिम तालको वातावरणीय प्रभाव मूल्याङ्कनका लागि परामर्श दाताको छनौटको प्रस्तावको मूल्याङ्कन भइरहेको कार्यालयले जनाएको छ ।
एक किलोमिटर लामो तथा दुई सय मिटर चौडाईको हुने सो ताल निर्माणको लागि डुवान हुने क्षेत्र भित्र पर्ने १५१ कित्ता तथा ताल वरीपरी आवश्यक पूर्वाधार निर्माण तथा अन्य प्रयोजनका लागि ३३९ कित्ता अधिग्रहण गर्नु पर्ने डिभिजन सिंचाइ कार्यालयका प्रशासन प्रमुख शारदप्रसाद दंगालले जानकारी दिए ।
भारतको प्रसिद्ध पर्यटकीय स्थल नैनीतालकै आकारमा तालको निर्माण हुने भएकोले यो ताल निक्कै आकर्षक र पर्यटकीय महत्वको दृष्टिले महत्वपूर्ण हुने उनको भनाइ छ । डीपीआर अनुसार ताल निर्माणको लागत ३ अर्ब १७ करोड रहेको छ ।
प्रतिक्रिया दिनुहोस !
