नुवाकोट: जिल्लामा ८ हजार बढि बालबालिका जन्मदर्ताबाट बञ्चित रहेको पाइएको छ। जसमध्ये धेरै बालबालिका गाउँपालिका भित्रका रहेका छन् ।
१२ स्थानीय तह रहेको नुवाकोटमा ६८ हजार ६ सय ७९ परिवार संख्या रहेकोमा २३ हजार १ सय ९६ बालबालिकाको मात्र जन्मदर्ता भएको छ। जसमा ८ हजार ८ सय ४६ बालबालिका जन्म दर्ताबाट बञ्चित रहेको एक तथ्यांकले देखाएको छ ।
नुवाकोटको विदुर र वेलकोटगढी गरी दुई नगरपालिकामा २ हजार ९ सय ६ जना र १० गाउँपालिकामा ५ हजार ९ सय ८० जना बालबालिका जन्मदर्ता बाहिर रहेको तथ्यांक सार्वजनिक भएको छ । विदुर नगरपालिकामा ५ हजार १ सय ६३ बालबालिकाको जन्मदर्ता रहेकोमा १ हजार ५ सय ९५ जना र बेलकोटगढी नगरपालिकामा २ हजार ९ सय २० बालबालिकाको जन्मदर्ता रहेको छ ।
वेलकोटगढीमा १ हजार ३ सय ११ जना बालबालिका जन्मदर्ता बाहिर रहेको छ । गाउँपालिकातर्फ दुप्चेश्वरमा १ हजार ३ जना, तादीमा ६ सय ९५ जना, सुर्यगढीमा ३ सय ६९ जना, किस्पाङमा ३ सय ७२ जना, म्यागङमा ४ सय ३५ जना, तारकेश्वरमा ४ सय ४३ जना, लिखुमा ५ सय ३७ जना, पञ्चकन्यामा ४ सय ५८ जना, शिवपुरीमा ६ सय ७ जना र ककनीमा १ हजार ६१ जना बालबालिकाको जन्मदर्ता नभएको तथ्यांक उल्लेख छ ।
यसैगरी,गाउँपालिकातर्फ नै दुप्चेश्वरमा कुल २ हजार ३ सय ३८ जना, तादीमा १ हजार ४ सय ७८ जना, सुर्यगढीमा १ हजार २ सय ८९ जना, किस्पाङमा १ हजार ४ सय १ जना, म्यागङमा १ हजार १ सय ५३ जना वालवालिकाको जन्मदर्ता भएको छ । तारकेश्वरमा १ हजार ३ सय १७ जना, लिखुमा १ हजार ४ सय ९४ जना, पञ्चकन्यामा १ हजार ७८ जना, शिवपुरीमा १ हजार ३ सय १९ जना र ककनीमा २ हजार २ सय ४४ जना बालबालिकाको जन्मदर्ता रहेको छ ।
जन्मदर्ता नहुनुमा सम्बन्धविच्छेदका साथै , पारिवारिक समस्या र अत्यावश्यक काम नपरी आफ्नो बालबालिकाको जन्मदर्ता नगर्ने लगायतका कारणले बालबालिकाको जन्मदर्ता नभएको एक प्रतिवेदनमा उल्लेख छ । संविधानले जन्मिएको ३५ दिनभित्र जन्मदर्ता गर्नुपर्ने प्रावधान छ। तर विविध कारणले बालिबालकाहरू जन्मदर्ताबाट बञ्चित हुँदै आएका छन्।
प्रतिक्रिया दिनुहोस !
