काठमाडौं : प्रधानमन्त्री पुष्पकमल दाहाल 'प्रचण्ड'ले बुद्धका शिक्षाबाट आफूहरू प्रभावित भएको बताएका छन्। लुम्बिनीमा आयोजित २५६७ औं बुद्ध जयन्ती तथा लुम्बिनी दिवस २०८० का अवसरमा सम्बोधन गर्दै प्रधानमन्त्री प्रचण्डले बुद्धका शिक्षाबाट प्रभावित मात्र नभइ जनयुद्ध संघीय लोकतान्त्रिक गणतन्त्रको स्थापनासहित शान्तिप्रक्रियामा रूपान्तरण हुनुमा बुद्ध शिक्षाको अहम भूमिका रहेको बताए।
प्रधानमन्त्री प्रचण्डले भने,'नेपाली समाजको आमूल परिवर्तनको आकांक्षासहित सुरू गरिएको महान् जनयुद्ध संघीय लोकतान्त्रिक गणतन्त्रको स्थापनासहित शान्तिप्रक्रियामा रूपान्तरण हुनु,क्रान्तिको नेतृत्व गरेको पार्टी र त्यसको नेतृत्वले विस्तृत शान्ति सम्झौतामार्फत् क्रान्ति र शान्तिलाई एकअर्काको परिपुरकका रूपमा व्यवहारसिद्ध गर्नु तथा राजनीतिक,आर्थिक,सामाजिक रूपान्तरणको सफल नेतृत्व गर्नुले बुद्धका शिक्षाहरूबाट हामी प्रभावित मात्र होइन,हाम्रो विशिष्टता र मौलिकतामा देश र जनताको सार्वभौम हितका निम्ति अनुशरणसमेत गरिरहेका छौँ भन्न सकिन्छ ।'
विश्वशान्तिका निम्ति स्वामित्व लिनुपर्नेमा हामी त्यसमा चुकिरहेको उनको भनाइ छ। उनले भने,'विश्लेषण र संश्लेषण गरेर विश्वशान्तिका निम्ति स्वामित्व लिनुपथ्र्यो,त्यसमा कतै हामी चुकिरहेका त छैनौँ भन्ने अनुभूत हुन्छ । यसतर्फ ध्यान दिन म बौद्धिक समुदायलाई अपील पनि गर्दछु ।'
उनले नेपाली भूमिमा बुद्धको जन्म हुनु नेपाल र नेपालीका लागि गर्वको विषय भएको बताए। बुद्धको जन्मले नेपाललाई विश्वमा चिनारी मात्रै नभई धार्मिक पर्यटनको माध्यमबाट असीमित सम्भावनासमेत उपलब्ध गराएको बताए।
प्रधानमन्त्री प्रचण्डले लुम्बिनी क्षेत्रको प्रचुर सम्भावना हुदाँहुँदै पनि सम्भावनालाई सदुपयोग गर्न नसकेको भन्दै वर्तमान सरकारले यस तथ्यलाई आत्मसाथ गरी कार्य अगाडि बढाउने बताए।
उनले वर्तमान सरकार बृहत्तर लुम्बिनी क्षेत्रमा रहेका ऐतिहासिक सम्पदाहरूको संरक्षण गर्दै दिगो विकासका लागि बृहत्तर लुम्बिनी गुरुयोजनाको कार्य थालनी गर्न तयार रहेको बताए।
यस्तै प्रधानमन्त्रीले लुम्बिनीको द्रुत विकासका लागि सरकारले लुम्बनीलाई राष्ट्रिय गौरवको आयोजनामा सामेल गरी लुम्बिनी गुरुयोजनाको कार्य अगाडि बढाइरहेको जानकारी दिए। उनले अन्तर्राष्ट्रिय दातृराष्ट्र तथा संघ संस्थाहरूको समेत सहयोग तथा सहभागितामा सरकारले कपिलवस्तु क्षेत्र,देवदह क्षेत्र तथा रामग्रामको पुरातात्विक उत्खनन्,संरक्षण,प्रवद्र्धन तथा विकास गरी स्थानीयबासीलाई विकासको प्रतिफल दिलाउन प्रयत्नरत रहेको बताए।
प्रतिक्रिया दिनुहोस !
